Hajrong i yakhih yong ka Joint Action Committee (JAC) kawa kynthup ya ka East Jaintia Hills Truck Owner & Driver Association waka Jaintia Hills Truck Owners’ Association, kawa da neh kattu la chi bnai pura pyrchah ya ka Dalmia Cement, East Jaiñtia Hills, deiwa ksoh wei pyndong ya waroh ki Truck kani ka karkhana hajrong i wym burom wei mano ko ya ki mat dawa yong ka JAC.
Kamtæ ka Dalmia Cement ha ka 12 tarik uni u bnai, da khut yaklam biang ko ya ka JAC ha Guwahati heiwa da hap ko wow pyndem hakhmat ka JAC deiwa pynhun ya ki mat dawa, kitæ toh deiwa e kit Cement 14 Truck chi sngi cha ki thaaiñ Barak Valley, Assam heiwa u e 7 Truck ya ka EJHTOTA wa 7 Truck won ya ka JHTOA. Da kular leh wa i kit Cement nadooh thaw thap hadooh thaw pynhaap toh u man ko kawa smat khlem da pynyang slem de ya ki Truck. Najrong ini, ka Dalmia da kular haroh ko wow pynku ya ka dor bai kit Cement wa da dawa da ka JAC naka warim iwa Rs.925 chi Ton cha ka Rs.975 chi Ton.
Katwa kamtæ, hajrong ini i pyndem ka Dalmia Cement hakhmat ka JAC, ka JAC haka yalang yong ka kawa da pynman jhan ko ynnin ka 13 tarik, da rai ko wow pyndam noh yei yakhih yong ka pyrchah ya ka Dalmia Cement deiwa sdang nadooh ynnin hi ka sngi hadien wa da wai katai ka yalang yong ka.
Heiyatoh won wa i yakhih yong ka JAC kattu la chi bnai pura pyrchah ya ki Bulker Truck deiwa khang ya ki u kit Cement ki na ki karkhana Cement yong ka East Jaiñtia Hills, u Deputy Commissioner ka East Jaiñtia Hills District, u Manish Kumar, hei emlang u Superintendent of Police, u Pankaj Kumar Rasgania wa kynthup ya kiwi tawon ki heh sorkar, da khut yaklam jhan u ya ka JAC wa ya kiwa yakhmat yong ki Bulker Truck kiwa kynthup ya u Devendar Bansal, Residential Director ka Star Cement wa kiwi kiwi haroh ha ka karma krehkaam yong oo ha Khliehriat.
Tangwa katai ka yalang ym em u poi ko cheiwon cheiwon leh, neibha ka JAC yieñ skem bait ko trait hajrong i yurim yong ka wa toh u pyndooh pyndam bait noh chisiendon yei kit Cement yong kini ki Bulker Truck na kitai ki karkhana Cement ka East Jaiñtia Hills, neibhah wa ktah ko yei yoh khih yoh khan wa ka jakpoh yong ki tre Truck kiwa toh ki tre ri tre muluk.
Neidaw wym poi cheiwon cheiwon katai ka yalang, u Deputy Comissioner da pynwai u ya ka deiwa kyntu ya kitai ki arliang mamla – ka JAC wa kiwa yakhmat yong ki Bulker Truck wow pyrchang noh wow ya pynbait yeini hapoh chitayaaw, dep neitæ yow wanrah won yeiwa da ya pynbait ki ha ka yalang ka wow khut biang u ha kani ka tyayaaw wow wan.
Heijooh i por leh neiliang yong ka JAC hadien wa da wai katai ka yalang ha Offfice u Deputy Commissioner, sa chisien neibynta ka hok wa i jakpoh yong ki tre ri tre muluk da rai ko wow nang pteiñ bait yei yakhih wa khlem booh por pyrchah ya kitai ki Bulker Truck dei wym chah hiwot tdot ya ki wow kit Cement ki na kitai ki karkhana.
Weiwa neibynta ini i yakhih wa dang pteiñ bait chakhmat, ka JAC kyrpaad ko ya waroh ki khon yong ka Ri Jaiñtia kyrpang ya ki seiñbhalang waphær waphær wow sñiawbha ki wow nang pteiñ yei e kyrchaan yeini i yakhih wa da pynman da ka JAC, khnang wa i hok ka jaitbru khian paaid yong i u yeiñ rasong wei eh-daw ko ha kiwon kiwon ki bynta.
Discussion about this post