Ynne ka sngi ki khon ka Raij Jowai hapoh i yahkhmat u Dolloi ka Elaka Jowai, u Puramon Kynjing da pyndep ki yei Pynkyntang ya ka Duwan u Blai Ryngkaw wa em ha Madan Ryngkaw, Tpep Pale, Jowai.
Dang step ka Dorbar Niam wa kynthup ya ki Wasan, u Langdoh, ka Langdoh, u Pator wa ki waheh wasian dapoi ki ha Yung Langdoh heiwa da em i ngooh i dem chwa wow mih dei kjat cha Madan Ryngkaw.
Manda poi ha Duwan U Blai Ryngkaw da em i ngooh i dem wei suit i choor na u Dolloi.
Hadien wa pyndep u Dolloi ya ka Dorbar Niam, ya i ngooh i dem, da bood won sa i ngooh i dem na ki yung ki Phra Kur Phra Kmai, ki Kur Yoh Ksiñ Yoh Mireñ, Yoh Okiang Yoh Naar, kiwa haap hei kyrdan Phra Kur na ka Pateiñ i Yang, Bula, To Kha wa Buikha, neitæ sa ki Saikhrong Saitri, ki Chong Kynthai Kynbiang wa ki Chong Bro Chong Khyndaw.
I e ngooh ha Duwan U Blai Ryngkaw da sdang i nadooh kamwa 7:00 waje i step wei da pyndep hadooh kamwa 7:15 i miet heiwa da pyndep yei e ngooh da ki spah tylli ki Kmaiyung wa ki Yungblai napoh ka Raij Jowai.
U Dolloi ka Elaka Jowai da khana u wa ynne da pynkyntang ya ka Duwan U Blai Ryngkaw hajrong ka yurim wow pyndep ya ka Pastieh Ryngkaw yow eh ka maaiñ ka kun ki khon ka Raij.
Da khana u wa ki Dolloi hawa chah jied ki hap ki wow pyndep ya i e ngooh ya ka Blai Myntdu wei hadien kamwa 10 snem toh u pyndep ya ka Pastieh Ryngkaw.
Chooh chooh da khana u wa ym ye u ong katwon snem wa da pep ka Pastieh Ryngkaw neibhah boon ki Dolloi ki wym em ye ki wow pyndep ya ka.
U Dolloi da khana u leh wa man iwa sñiawkmen wow ye u pyndep ya ka Pastieh Ryngkaw neibhah u hikai ko kammon u tip ya ka ratab yong ki kur neibhah wa lai ki chirup wa ki kaam niam wa ki kaam synchaar.
Discussion about this post