Ka Behdieñkhlam ka Raij Mukhla kawa man ka lehniam Behdieñkhlam kawa khaddooh yong uni u snem da poi ko chawa kut ynne ka sngi ha Aitnar, Mukhla.
Kani ka lehniam kawa da sdang nadooh ka Pynsiñ ka 22 tarik da pyndep ya kiwa boon ki bynta kani ka lehniam.
Ynne ka sngi pynkut ya kani ka lehniam wa soo sngi le yaw won, dang step da pyndep ya ka kyntiñ khnong kyntiñ Dieñkhlam ha Yung Blai yeiwa da pynbood won ya ka Kñia wa i lai chaad yung.
Hei sngi nawon, u Langdoh, u Sngot, u Maji wa ki waheh na ki kur da yachem ki ha Madan Slot Masi heiwa da rah ya ki le tylli ki Rong ki Rot kiwa da wanrah na Umlangchor, Neiñchnong wa na Wahchnong.
Hadien wa da tympat ya ki le tylli ki Dieñkhlam wa da pynyieñ ha Madan Slot Masi da wanrah ya ki cha Aitnar; wei manda dep pynchong pynthiah ya ki harood Aitnar da wanrah noh sa ya ki Rong ki Rot.
Ya kani ka lehniam ha uni u snem da yaleh u pynduna yei em paidbah neibhah da hap wow bood ya ki kyndon ka sorkar wow yada na ka khlam u COVID-19.
Neiliang u Langdoh ka Raij, u Wanbha Lyngdoh da ong u wa ha uni u snem ka lehniam da man ko kawa laibait wei waroh ki bynta yong ka Behdieñkhlam da man ki kiwa miat wa bha.
Chooh chooh da kyrmen u wa deiwa pyndep ya kani ka lehniaam daw ye wow khang u da na ka khlam u COVID-19 ha waroh kawi ka ri, ka jylla ka chnong ka thaw wa ka pyrthai hi leh waroh kawi.
Ya kani ka lehniam ha ka sngi khaddooh da wan sakhi da u MLA ka thaaiñ, u Wailadmiki Shylla, u Dolloi ka Elaka Jowai, wa kiwi kiwi.
