Kamwa jooh man khlieh ki snem, ynne ka sngi, ki khon Niamtre ka Raij Mynso da pyndep ki yaka Lehniam Chaad Tyllu kawa man ka lehniam chwa wow hiar rep ki cha hali wei ya kani ka lehniam da pynman ha Pdeiñ Tyllu, Lumphlang, Mynso A, West Jaiñtia Hills.
Kani ka lehniam ha uni u snem da sdang ko nadooh ynnin i miet da i Chaad Synyaaw na Loom Lariang wei da kynrood kajiak chisien dei dien hadooh wa poi ha Madan Dieñtyllu chirup i tem yaka ksiñ, ka Lakudiah wei put chawiang.
Chwa wow pynman yei Lehniam Chaad Tyllu ynne ka sngi, da em ka yalang wa pynlai da u H.B. War uwa man kam u President ka Seiñraij Mynso, heiwa u O.H. Toi, President ka Seiñraij Jowai da man u kam u kongsan hei emlang u Pator ka Elaka Jowai, u Raymond Nartiang, u Dolloi ka Elaka Mynso, u Karmi Myrchiang wa kiwi de.
U W. Shylla uwa man kam uwa e buit yaka Seiñraij Mynso da klam u hajrong kani ka lehniam heiwa da khana u wa kani ka lehniam toh kawa pynjooh nadooh ki por nachwa wei toh ka wow paan ya i bha i miat wa i kyrkhu kyrdoh ym du kat ya ki Niamtre.
U O.H. Toi hawa e i klam da ong u wa ka chnong Mynso toh kawi na ki chnong warim bha chirup waka Jowai, ka Nartiang neibhah da sakhi wa embynta ko ha ki thma wa kiwi kiwi.
Da ong u wa u Trekirot toh uwa hakhlieh tam uwa da chynna jngai heiwa da e u yaka Bei Ramaw kawa psa kawa pyndap pynbiang yeiwa emkaam ki bru.
Ha kani ka yalang da yoh ya i kyntien Ngoohblai na u Kynmo Miki Situng, i klam pdiang burom na ka Ebrielty Sungoh katwa ya ki kyntien khublei da yoh na u P. Situng uwa man u Waheh Chnong ka Thadialong.
Hadien ka yalang, ki khon khynroo khyllood da chaad ki iwa man chibynta yong kani ka Lehniam deiwa ksoh-kti lang hei kieh ki sur ka chawiang, ka ksiñ waka lakudiah.
Manda dep i chaad, ki khon ka Raij da pyndep won ki yaka Kñia Syiem Tyllu hapoh i pait i yoo u Dolloi, u Pator wa ki waheh wa sian heiwa da kñia da u sniang.
Discussion about this post