Ka Tep Kyndait Government U.P. School, Tuber Kmaichnong da pynkut ko ya ka Training kawa pynman ko nadooh wa sdang u bnai April yong uni u snem. Kani ka Training toh kawa toh u kut nadooh u June, tangwa neidaw wa boon ki sngi chuti ha ki sngi wa dadep kamtæ da pteiñ u pynman ya ka hadooh ka 31-07-2026.
Hei klam yong u Riquoma Rq. Laloo kam u Headmaster yong ka skur, da ong u wa chiboon i myntoi ki khynnah kynthai deiwa yoh kam kani ka Training. Da e khublei u ya ka West Jaiñtia Karate-Do Association, Jowai, wa da yahkhmat u wan cha Tuber da u Ribait Oo Pde (Black Belt), uwa man u Instructor ya ka Training, wei da chimkhia bha u wow e sikai ya ki khynnah ha ka skur.
Ong chooh chooh u wa toh u e buit cha ka sorkar yow pteiñ ko ya kam kini ki Training wa pynmyntoi chiboon ya ki khynnah skur kynthai. Ong u wa kamwa da yoh ya kani ka Training hei pyrtuid ka Scheme Rani Lakshmi Bai Atma Raksha Pratiksha wa da kyrchaan poisa da ka yung krehkaam u District Mission Co-Ordinator Samakra Shiksha, East Jaiñtia Hills District, sñiaw toh haroh u wow e khublei ya ki. Kyntu won u ya ki khynnah wa da yoh yei sikai, wow makhane ki yeiwa da yoh deiwa pynemkaam ki man-ka-step næ janmiet, deiwa sikai samen ha yung, yow lait u sepai i tip wa da sikai ya ki.
Da yoh yei kyntien e khublei na ka Waphasan Bareh, MA. M.Ed, kawa da e khublei kyrpang ya ki laad pathai khubor kiwa da yarap wow pynmih khubor neipor cheipor neibynta kiwa boon kiwa da leh ka skur.
Hadien neitæ da saam ya ki Certificate of Participation cha waroh ki khynnah kynthai ka skur, kiwa man heijooh i por kiwa da yoh yei sikai hanla heipor wa kajiak leh.
I pyntip na ka Miss Eitilang Siangshai, MA. B.Ed, kawa sikai yong ka skur hi.
Discussion about this post