Ka Deen Dayal Upadhyay Community College (DDUCC) for Skill Development, Wahiajer da pynkut ko yei e sikai wa 8 sngi hajrong ka “Embroidery & Indigenous Design Techniques” neibynta ki khynroo khyllood kawa sdang nadooh ka 22-07-26 wei da pynkut won ha ka 30-07-26.
I thmu yong kani ka e sikai toh yow pynkupbor ya ki khon khynroo khyllood tre ri khamtam ya ki kynthai ha ka imlang sahlang deiwa pliah ki hei kam soor that, iwa emkaam leh neibynta i laitlooid ki hei yoh i kot wa neh.
Ha ki 8 sngi da yoh yei sikai na ka Heihokwanki Lytan wei da em kamwa 30 ngut kiwa chimbynta.
Ha kani ka sngi pynkut, u Prof. H. Lamin, (Retd.) uwa man kam u Founder Principal I/c DDUCC, da man u kam u kongsan, u Hunbait Chyrmang, Executive Engineer ka MePDCL, Mustem WJHD kam u symbood kongsan hei emlang u Latu Nartiang, Branch Manager ka MCAB Ummulong, u Lukas Jat, dkhot ka Dorbar Chnong Wahiajer, u Pastor Reveal Singh Phawa wa u Dr. F.R. Sumer, Principal I/c, DDUCC.
Hawa klam, u Prof. H. Lamin da e khublei u ya kiwa chimbynta wa da ye ki u pyndep hok ki yei chah sikai, da pynchlur u leh wow pynemkaam hok yei sap wa da yoh dei wow sdang leh yei khih i khan ym du u im ya samen tangwa yow e khih leh ya kiwi haka imlang sahlang.
Kyntu haroh u yow pynneh pynsah yei stat wa i sap tynre hei lai luti yong i im iwa man chibynta ka thaaiñ wa ka dustur riti ka jylla.
Kiwi won wa klam kynthup ya u Hunbait Chyrmang, u Latu Nartiang wa u Lukas Jat kiwa da pynsñiaw yei kmen wow yoo wa ki khon khynroo khyllood wan ki chakhmat wow pynlai yumut neibynta i sikai, wei da e mynsien haroh ki u yieñ ki hei kjat yong ki hi deiwa kheiñkor leh yei sap wa em ki najrong wow man kiwa kreh chitom.
Kani ka e sikai ka DDUCC/NEHU yow pynku pynroi yei sap man ko leh chibynta ka NEP 2020 wei kawa yahaap wa i thrang wa bha wa i thmu u (L) Pandit Deen Dayal Upadhyay ya uwa da e naam leh hei pyrtuid yong oo ya kani ka College.
Neiliang ka College da sñiaw burom ko leh ya ka Heihokwanki Lytan, kawa man kam ka bru chemphang wow pynchlur wow e mynsien ya kiwa chimbynta.
Ha ka yalang wa pynlai da u Wolnish Rymbai, Program Co-ordinator da yoh i klam pdiang na u Dr. F.R. Sumer.
U Wolnish Rymbai wa kiwi won kiwa kreh kani ka College hei klam yong ki da ong ki wa ki e sikai yow pynku yei sap toh kiwa da jooh pynman kani ka College man-i-por wei da yoh yaroh ki leh na ki paidbah heiyatoh ki laad yarap wa da pynmyntoi ya ki bru haka imlang sahlang lyngba i yoh ki ya ki jait sikai waphær waphær.
Khaddooh da pynkut ya ka yalang da i saam Certificate cha waroh kiwa chimbynta.
Discussion about this post