Ka Deen Dayal Upadhyay Community College (DDUCC) & Skill Development Centre, Wahiajer kawa man kam ka chnat College ka North-Eastern Hill University (NEHU) da pynman ko ya ka e sikai wa 8 sngi kawa tip kam ka “Barber Training” neibynta ki khynroo chynrang ka Jaiñtia Hills wa da pynman nadooh 19 hadooh ka 27 tarik uni u bnai.
Da wan wow chimbynta kamwa 45 ngut kiwa angood wow tip kammon wow ah sñiooh katkam ka juk wa katni chirup i pynmiat yei dur i dar hei pynyoo da uwa pnah kti ha kini ki kaam, u Sai Monmi Kyndait.
Ha ka sngi saam Certificate cha kiwa pyndep yei sikai, da wan wow sakhi da ka Jacqueline Nongkhlaw, Director ka PNB, Rural Self Employment Training Institute (RSETI) kam ka kongsan, wa u Latu Nartiang, Branch Manager, MCAB Ummulong kam u symbood kongsan.
Hawa e ki yei klam da ong ki wa emkaam bha u yoh yei sikai wa paka hei rukom ah sñiooh katkam ka juk wa katni, wei deiwa pynman kam kani ka e sikai pynchlur ko leh wow seiñ khih seiñ khan wei ki Bank leh ye ki u e i kyrchaan ha iwon iwon i por.
Da emlang leh ha kani ka sngi wa u Dr. F.R. Sumer, Principal I/c, DDUCC, u Andriew Sari, Secretary ka chnong Wahaijer wa kiwi tawon. I thmu kani ka e sikai toh kam chibynta ka thong ka DDUCC/NEHU hei wow kyntu kynrong ya ki khon khynroo wow pynemkaam ki yei sap kawa ki em ki, iwa man kam chibynta yong ka NEP 2020.
Ya kani ka yalang saam Certificate da pynlai da u Wolnish Rymbai, Programme Co-ordinator, heiwa neiliang yong oo da ban joor u wow man kiwa chimkhia ya kiwon kiwon ki e sikai wa da pynman neibynta u kyntu kynrong yei yoh i kot lyngba ki sap waphær waphær.
Discussion about this post