Ki 5 ngut ki kyrtong yaleh MLA ka 1-Nartiang Constituency wa kynthup ya u Sniawbhalang Dhar naka NPP, u Generous Paslein kam u kyrtong samen, u Rimiki Sari na ka BJP, u Dawan Lyngdoh na ka UDP wa u Emlang Laloo na ka Congress da wan ki wow pyndep ya ka bynta wa khaddooh yow sylli ya ki kot ki sla namo ka Scrutiny ynne ka sngi katkam wa da booh tarik booh kyndon da ka Election Commission of India.
Ya kani ka Scrutiny da leh ha Conference Hall u DC, Jowai deiwa emlang ki Returning Officer wa pait ya jar jiar ki Constituency wa em ha West Jaiñtia Hills kamjooh ki General Election Observers heiwa da chem wa waroh ki kot ki sla ki kyrtong man ki kiwa da biang yow lai chakhmat wow yakhun Election.
Na waroh ki kyrtong lait na u Sniawbhalang toh kiwa dang yaleh Election MLA dang hei sien wa nyngkong.
Ha u 2018, u Sniawbhalang da jop u deiwa yoh 16,604 Vote wei da wan wa ar u (L) Jopthiaw Lyngdoh na ka Congress uwa da yoh 14,506 Vote.
Hapoh ka 1-Nartiang (ST) waroh da em 44,337 ngut kiwa thap Vote heiwa 21,821 ngut toh ki chynrang wa 22,516 ngut ki kynthai kawa man leh ka Constituency wa boon Vote dooh hapoh West Jaiñtia Hills.
