15 49.0138 8.38624 1 0 4000 1 https://wyrta.com 300 0

Pyndep ki khon ka Raij Mynso ya ka lehniam Behkymphui

0 Comments

Jowai: Ka lehniam Behkymphui wa jooh pyndep khlieh snem ha chnong Mynso, West Jaiñtia Hills District da ki khon niamtre ka Raij Mynso, hajrong i thmu wow e ngooh e dem ka kñia ka khriam neibynta wow beh ya ka khlam i chitom saja wa i sih i roi kamjooh leh wow bha u kba u khoo.

Ha uni u snem leh da pyndep ya ka hapyrdi i phooh i phieñ wei da chimbynta da ki khon ka Raij ryngkat i chaad wei rah ya ki Kymphui wa da pynkhreh da man la ki thyndai yung hapoh ka Raij.

Ya kani ka lehniam da pyndep ha ki ar sngi lynter wei da pynkut noh ynne ka sngi heiwa da pyndep ya ka ngooh ka dem ka suit ka choor ha Yung Langdoh wa da yahkhmat da u Langdoh, u Dolloi, Chutia, wa kiwi kiwi.

Hadien wa da dep e ngooh ha Yung Langdoh da mih wow lai cha thaw kñia dei chaad i kyriaw i kbai kyrha wei da pynchaad leh ya ki Kymphui tymbud luti.

Manda poi ha Khlooblai da seh ya ki kattu katni tylli ki Kymphui wei da lai biang cha ka thaw kñia wei chwa wow poi ha Iaw da tyngkheiñ ya ki khlam.

Ha i thaw wa tip kam ka Um Ñiawwyrnai kawa em ha Iaw da engooh ya kani ka Thaw wei kiwa chimbynta da hiar ki cha kani ka um wow chaad ha ka wei neini da mih ki wow lai pyndep ya ka Kñia Syiemkhlam Syiemdait da u sniang ha i thaw wa tip kam ka Duwan Madan Myrneiñ heiwa da kñia da u sniang wei ya kani ka kñia da pyndep da u Chutia.

0 Comments

Leave a Reply