Pyndep ki khon u Niawtrep Niawwasa yei ku pynehdaw eh rngu hajrong u Lum Sohpetbneng

Jowai: Kam wa jooh man ha ki snem wa dadep dalai ha uni u snem leh ki khon ka Niamtre-Niamkhasi na kylleiñ ki loom Khasi-Jaintia hei yahkhmat ka Seng Khasi Sengkmie Mawkhar, Lumsohpetbneng Committee da pynman biang ko yei ku pyn eh-daw eh-rngu hajrong u Lumsohpetbneng ha ka sngi Musiang 3 tarik u Thohlakhmi heiwa ki khon ka Niamkhasi-Niamtre na kylleiñ ki chnong ki Raij dawan ki wow sakhilang ya kani ka sngi hapyrdi i pyrthai myndær wamiat chit che ka syiem sngi.

Ha kani ka step chwa wow sdang i lai ku cha i bynta ka Duwan wa em hajrong u Lumsohpetbneng da kdar luti chwa da i ngooh i dem natre hei yahkhmat ki wasan waheh ka Niam Khasi hapyrdi i chimbyntalang ki waboon walang.

I sakhi ya kani ka sngi i lai ku chajrong u Lumsphpetbneng da chem wa ki khon ka Niamkhasi-Niamtre dei ngait niam wa sakhiat khlem da kheiñ yei jngai ka luti, i ngiah i jrem nadooh ki manbei, manpa, ki tymmen, khynroo khyllood deilang wa ki khynnah thop pa thop ku ki wow li yoohkjat hadooh wa poi heidoh i pran wa em ka Duwan Kyntang hajrong u Lumsohpetbneng.

Yei lehniam hakhmat ka Duwan Kyntang da e da siang da u tymmen u san ka Sengkhasi Kmie u Skor Jala chirup i synranlang, ki Syiem, ki montri, u Dolloi ka Elaka Jowai u Puramon Kynjin wa kiwi kiwi ki waheh wasian ka Niam Khasi-Niamtre.

Ha ka sngi pynkut ya ka Shad Nongkrem wan e kti u Lat ya ka aiñ Hima Khyrim Act, 2024

November 12, 2024

Da pynthymme ya kiwa kitkaam ka Khyrdoh Kur Passah

November 11, 2024

Hadien wa dadep i ngooh i dem, i pynap blai pynap syiem wei pynsum pynsait ya ka Duwan Kyntang da ka um kroh um krem, um ksiar um rupa ka bynta wabood won toh i yohlaad u waboon walang wow pyndep yei ngooh i dem ha khmat ka duwan Kyntang wei chim yow khoo wa ka um kawa man chibynta i kyrkhu kyrdoh wow saam u e cha waroh ki khon ka Niam Khasi-Niamtre kiwa da wan ya embyntalang ha kani ka sngi hajrong u Loomkyntang-Loom em naam em parom ka bri u Niawtrep-Niawwasa.

Wow pynkhroo chooh chooh yei man kyrpang kani ka sngi hajrong uni u Loomkyntang da pynwyrngia ya kiwa wan sakhi najan najngai da ki chaad wa ki rwai kiwa da yachimbynta da ki khon ka Seiñraij Shillong, Sengkhasi Kmie Mawkhar, Seng Khasi Nongthymmai wa kiwi kiwi.

Photos Contributed by Soolangki D.Laloo.