Kam chibynta wow yarap ya ki bru wa dooh ya ki Mobile Phone yong ki nei chah tooh næ wiar, neiliang ki pulit ka West Jaiñtia Hills da chem wei da pyndong ki ya 47 tylli ki Mobile cha ki tre hadien wa pynsakhiat yei mantre ki.
Ki pulit ka West Jaiñtia Hills da yoh ki ya ki ujor wa wiar næ chah tooh ki Mobile ki la kattu katni bnai wei deiwa pynemkaam ya ki stat Technology wei i takit, ki pulit da chem ki ya kini ki Mobile na kylleiñ ki thaw ka District wa na kiwi ki District wot na baar jylla leh.
I takit leh dang lai i chaphrang wow chemdien ya ki bru wa emkti ha ki kaam wow dai ya ki Mobile wa chah tooh wei daw pynchitom ki katkam ki kyndon ka aiñ.
Da kyntu leh ya ki paidbah wow man kiwa syndong hawa thied ya ki Mobile kiwa dadep pynemkaam khamtam na ki bru wym tipmit khlem da pynsakhiat yei mantre ya ka Mobile khnang yow lait u thied da ki mar wa chah tooh.
I pyrchang leh dang lai i chaphrang wow thooh ya kiwi kiwa wiar næ chah tooh khnang wow ye u pyndong ya ki cha ki tre.
Discussion about this post