U State BJP President, u Ernest Mawrie da pyndam u yei ksoh u CEM warim ka GHADC, u Boston Marak yei kaam State President ST BJP Morcha hadien wa ka Meghalaya Lokayukta da lai ko chakhmat wow Charge Sheet ya u Boston deilang wa 12 ngut kiwi heiyatoh wa i baam tooh ya ka poisa hawa pynchna ya ki kreh ka GHADC.
U Ernest da ong u wa hadien wa da chah Charge Sheet u Boston daw e kti ha ka Disciplinary Committee ka Party wow rai kammon wow pynchitom ya oo.
Da ong u wa ka BJP ym chah ko ya kiwon kiwon ki jait baam tooh kamtæ da chim ka rai wow pyndooh noh ya u Boston Marak yei kaam wa ksoh u kam u Schedule Tribe Morcha President chi syndon.
Ka Lokayuta najrong ki MDC da pynngat ko ha ka Charge Sheet ya kiwa kreh ka GHADC hapoh ka kyndon Section 7 wa 12 ka aiñ Prevention of Corruption Act 1988, wa kynthup leh ya ki Executive Member warim kam u Mark Goera Marak, Jimbirth Marak, Levastone Sangma, Righteous Sangma, Rupert Sangma, Kenedick Marak, Dhormonath Sangma wa u Deputy Chief Executive Member warim, u Winnison Marak, ki MDC warim, u Ismail Marak, u Secretary ka GHADC, u Hewingson Sangma wa ki Contractor kitæ u Kubon Sangma wa u Nikseng Sangma.
Ya ka ujor ha ka Lokayukta da e da u Nilberth Marak ha u 2019 yei wym em pynkrehkaam ya ki kreh hapoh ka Asanang Constituency, West Garo Hills ka GHADC wa mihkhmat da u Ismail.
Da em 49 tylli ki kreh wa da booh neibynta ka Asanang Constituency neibynta u snem 2017-2018 wei waroh kini ki kreh da e cha ki arngut ki Contractor kitæ u Kubon wa u Nikseng kiwa da chah Charge Sheet lang.
Hawa pynman ya ka takit da chem wa na ki 49 tylli ki kreh wa toh u pyndep hapoh ka Asanang Constituency da chna du kawi ka trep ha Balupara wa kawi ka Top um ha Daljagre.
Neiliang u Boston Marak da lai rah u ya kani ka kaam cha ka Meghalaya High Court kawa da pynsangeh chwa ya ka hukum ka Lokayukta heiwa u muktiar u Boston da ong u wa ka Lokayukta hawa e ko yei bichaar ym em e laad ko ya u Boston wow yasaaid u iwa man leh pyrchah ya ka Section 21 ka aiñ Meghalaya Lokayukta Act, 2014.
Kam wow pynkynmoo wa ka Lokayukta da pynmih ko ya ka hukum ha ka 18-05-23 wei ka High Court da pynsangeh ko ya kani ka hukum ha ka 5 tarik uni u bnai ha ka jooh ka sngi wa pynbna u Ernest Mawrie wa da pyndooh yei ksoh kaam u Boston.
U Boston Marak chwa ini da dep lai u cha ka High Court yow pynsangeh yei takit da ka CBI heiwa da phah pynman won da ka Lokayukta hi.
