Ki le ngut ki MDC yong ka BJP ha JHADC, da ong ki wa u Montri yong ka District Council Affairs, u Lahkmen Rymbui da pyndooh mynsien u ya ki khynroo khyllood ka jylla deiwa ong wa toh u bood yaka nongmuna ka JHADC wow pyndooh kreh ha ki ADC, du neidaw wym ye ko u su tulop, heithaw wa u Montri u yarap u wow thooh ki laad ki luti wow pynyoo yaki ADC wow pynyoh kaam yoh jam ya ki khynroo khyllood wei wow pynemkaam hok ya kiwon kiwon ki yoh lum dan khnang wow ye ki u pyntyllung ya ki kaam hapoh ADC wei wow pynlait yei bhah (Share) yong ki ADC ha i por wa biang yow ye ki wow su ya ka tulop ki wakreh.
Ki le MDC da pyntip ki wa ka JHADC da dep ko wow rai lyngba ka Resolution ha yung dorbar wow pyndooh kreh hadooh 800 ngut ki wakreh ka JHADC kiwa em katni kamwa 1800 tam iwa da pynpoi ya ki wakreh ha JHADC wow em ki du 1000 ngut.
Hanla kattæ leh ym pu ye wow su yaka tulop kattu la chi snem hapoh i yahkhmat u T. Shiwat kam u CEM khamtam ka JHADC kawa jooh tip waroh chi kattu kawa jooh boon poisa.
Kamtæ da ong wa lada kiwi bood ki yaka nongmuna ka JHADC, wot kiwi ki chnat sorkar leh hapoh ka jylla hap ki wow khang neibhah boon ki wakreh hap ki wow mih sarok yow dawa tulop nadooh ki wakreh ka MeECL, kiwa sikai SSA, ki wakreh 108 wa ki wakreh ka MCCL.
Ki MDC ka BJP da ong ki leh wa lada ka Council pynemkaam hok ko yei bor yong ka, ye ko wow pynmih chiboon ka poisa tangwa da leh ko da ki kaam kiwa ktah ya kiwa dooh wa duk deiwa rai wow booh yaki Check Gate yong ki Dolloi ha waroh ki Elaka katwa ha ki karkhana pynmih khyndaw-bilat, ki Coke Factory kiwa kamai da ki klur kiwa em hapoh ri-loom Jaiñtia won ym nood ki.
Hajrong ini waroh da phah ya u Montri wow phah yaka Executive Committee yong ka JHADC wow pynemkaam hok ya i bor yong ka neibynta ki Cement Factory wa ki Coke Factory kiwa kamai da ki klur tyngka chi sngi deiwa lai lait ya ki kyndon ka JHADC wei da em leh ki Factory kiwa ym em su leh yaka Renewal Fees yong ki.
