Neiliang u Montri Rangbah ka jylla u Conrad Sangma ynne i janmiet da pynbna u wa da pynduna chooh chooh ka sorkar yei dor Petrol wa Diesel najrong ka T. 2 kawa da dep pynduna ini wa dep.
Ya i dor Petrol da pynduna yaka dan kawa katni kawa man 31.62% iwa mut T. 17.60 chi liter wa chim ka sorkar, da pynduna cha ka 20% iwa dei dor da poi T. 15 chi liter najrong ka T. 2 kawa da dep pynduna chwa. Ini mut wa i dor Petrol ha Shillong daw hiar i naka T. 91.26 cha ka T. 85.86 iwa da hiar da T. 5.4 chi liter ha Shillong iwa daw krehkaam nadooh myntu ka pyrdi synyaw manda kylla tarik cha ka 17 tarik. Wei deiwa kheiñlang waka T. 2 wa da dep pynhiar da poi kamwa T. 7.4 chi liter da duna i Petrol ha Shillong katwa cha kiwi ki District daw yaphær i malu mala wei daw duna khamtam ha Ri Bhoi.
Heiyatoh won wa i Diesel, ka VAT da man ko 22.95% iwa da poi T. 12 chi liter, da pynduna cha ka 12% iwa mut da hiar T. 9 chi liter wa chim ka sorkar, kamtæ i Diesel daw hiar dor i naka T. 84.23 cha ka T. 79.13 ha Shillong iwa hiar da T. 5.1 chi liter wei lada kheiñlang waka T. 2 wa da dep pynhiar chwa da hiar i dor da kamwa T. 7.
Kamtæ i hiar i dor i Petrol wa Diesel waroh da man i kamwa T. 7 chi liter.
U Conrad da ong u wa da leh ya ini yow lait ko u ktah ya ki paidbah kiwa da maad yei eh neidaw wa ku dor.
Chooh chooh da ong u kamwa da leh nachwa, yei dor Petrol wa Diesel da pynduna bait bar ya i dor ha Assam yow pyntikna wym chah ktah i thied phniang hapoh ka jylla.
