Shillong: Ka Executive Committee ka United Democratic Alliance (UDA) ha Khasi Hills Autonomous District Council (KHADC) hapoh i yahkhmat u Teinwell Dkhar kam u Chief Executive Member (CEM) da chah pynhaap noh ko hadien i pynyoo bor wow e rai khaddooh da u Chairman ka yung dorbar, u Pynshngain N Syiem uwa man u MDC ka NPP.
Ka UDA toh ka dhab synrop ki seiñ saiñpyrthai wa synchaar ha KHADC wa kynthup na ka Peoples’ Democratic Alliance (PDA) kawa em ki MDC na ka NPP, PDF wa ki MDC samen wa ka Regional Peoples’ Alliance (RPA) kawa em ki MDC na ka HSPDP wa UDP kiwa em waroh 19 ngut.
Hawa wanrah ya i wym chaniah ya ka EC, ki dkhot ka liang pyrchah kiwa em 10 ngut, wa kynthup 9 ngut na ka Congress wa ka Grace M Kharpuri kam ka MDC samen da pynbaad ki wa kani ka EC ym em u krehkaam ko ha kini ki 8 bnai.
Hadien i yania, neiliang ka liang synchaar hajrong i chah pynbaad, neiliang uwa yahkhmat ka liang pyrchah ym em u randien u heiwa da ekti noh ha u Chairman, u P N Syiem wow e ya ka rai wa khaddooh. Neiliang u Chairman da ong u wa ymye u wow e ya ka rai katwa kiwa yahkhmat ka liang pyrchah ympu pynbna ki lada da pyndam noh ya ini i wym chaniah.
U Lamphrang Blah hadien wa da yoh pynche u na u Chairman, da rai u wym randien iwa da pynman ya u Chairman wow pynbna noh da i thap Vote wow tip katwon ngut kiwa dang kyrchaan ya ka UDA.
Ha i thap Vote ha ka dorbar kawa em 29 ngut ki MDC, ka liang synchaar wa ka liang pyrchah da yoh ki mar 14 Vote. Neidaw wa ong ka kyndon wa hawa ymye u e rai nei yaryngkat bor, u Chairman da pynbna u wa haap chim ya ka rai deiwa chimbynta ha i thap Vote yeiwa da e noh u cha ka liang wa pyrchah ya ka EC.
Da ini i rai u Chairman pyrchah ya ka EC da pynman ko ya ka liang pyrchah wow yoh 15 vote wei ka liang synchaar da yoh ko 14 Vote. Hadien ini neiliang u Chairman da pynbna u wa ka Executive Committee ka UDA da haap noh ko. Chooh chooh da pyntip u wa i pynyoobor neibynta ka chuki CEM wa thymme u man ko ha ka 22 tarik uni u bnai.
Chwa ini, neiliang u Deputy Chief Executive Member, u Pyniaid Sing Syiem heipor wa pynche u yei pynbaad ka liang pyrchah da phah yieñ u leh ya ki para MDC kiwa em cha ka liang synchaar wow pynyoo yei boon paaid. Tangwa heitæ i por 2 ngut ki MDC ym em u yieñ ki, ka Macdalyne S Mawlong kawa man ka MDC ka PDF na Umsning wa u Mitchel Wankhar u MDC ka NPP na Laban.
Discussion about this post