Jowai: Ha kani ka sngi Chohthat ka 17 tarik ka Rotary Club Jowai hei yakrehlang wa ka Kynroo Khyllood Committee Seiñ Raij Jowai da pynkhooid ki ïa ka Khliehriat-ka-Kiang kawa em ha Panaliar.
Ini i thaw man i iwi na ki thaw wyrngia ki bru nadooh ki waheh ki khynnah, kiwa uiñ sawari kiwa phetke yow baam laær pyngngaad.
Tangwa wa ini i thaw man i iwa dap du i tngit i jhep wada noh da ki bru wa wan cha ini i thaw kani ka thaw da man ko kawa dap sadu ki plastik ki song chip. Ki bru kiwa wan cha kani ka thaw, heithaw u chong ha ki thawchong wa da booh da chong pathan ki ha ki thaw chaniah iwa pyntngit ïa ki thaw chnongke.
Hadien wada pynkhooid ïa ini i thaw deiwa niaam rong ïa ki thaw chong, niaam puchara ïa ki chram kamjooh leh ïa ki dieñ wa em ha ini i thaw wei da dep lum ïa ki jhep na kani ka thaw. Tangwa du hadien ar sngi da chem wa kani ka thaw da sdang biang ko u dap da ki jhep ki plastik. Kamtæ ynne i step ki dkhot ka Khynroo Khyllood Committee da yachem ki wa ki nongthoh khubor heiwa da kyrpad ki cha ki paidbah wow sñiawbha burom ïa ini i thaw iwa boonsien pynemkaam ki yow pynstiñ yei pyrkhat pyrdeiñ.
U Chairman ka Khynroo Khyllood Committee u ma Wyraiki Kharbuki da ong u “Lada ini i thaw man i iwa jakhlia tæ ym myntoi i em ini i thaw heini neibhah ym yoh de ki bru u maad yeiwa ka Bei Rymaw da e ko ïa I”.
Chooh chooh na i liang u Secretary ka Land Committee u ma L. Laloo da pyntip u wa da em i pyrkhat yow booh noh dei por wa ye ki bru u wan cha ini i thaw khnang wow pynduna yei pynemkaam bakla ki bru ïa kani ka thaw deiwa noh jhep noh plastik heini.
Kam wow pynkynmoo ïa kani ka thaw da pynmiat deiwa yoh poisa na ka Ministry of Tourism Government of India weiwa da wai paidbah ïa kani ka thaw da u Conrad K. Sangma ha ka 20 Ñaisaphra 2008 wei da khut ïa ka kam ka Syntu Ksiar Viewpoint.
Discussion about this post