Ka Raij Namdong hapoh i yahkhmat u Isidorius Pakma da pynkhreh ki wow sai kyrtong u wow yakhun ha ka Election MLA 2023 deilang waka thong wow pynmankaam yei emkaam ki paidbah ka 1- Nartiang Assembly Constituency, deiwa ong wa hadooh kini ki sngi ym pu ye wow pynkylla dur hawa yatoh wa i eh ki paidbah wa chong chnong khamtam kiwa dooh wa rangli.
Ka kyrwoh da ong ko wa ym ye wow len wa u MLA wa katni da pyrchang u wow yarap, tangwa dang em ki chnong kiwa dang chah iehbeiñ hadooh kini ki sngi kamjooh ym ye wow pynbiang ya iwa emkaam kam ka puræ puthi, heiwa kiwa boon toh ki yong ki bru samen wa ki kiwa pynlai daka niam kiwa man leh du haka kyrdan Secondary, katwa ki skur sorkar kiwa boon toh ki Primary School kiwa da man kam ki trep sniang, trep masi ki wym em pynchna de.
Chooh chooh da ong wa i kaam wa yatoh wa i chait i khiah kam ka nongmuna ka Namdong PHC kawa da yoh yaka yung krehkaam nadooh u snem 2012 tangwa hadooh katni ym pu ye wow pynbiang yeiwa emkaam ki paidbah iwa da chim por kattu la 9 snem ka ym pu ye wow wai kawa da krehkaam bait kam ka Sub Centre kawa em du uwi u Doctor kawa pait leh ya 36 tylli ki chnong wa ki paidbah wa palat 30,000 ngut nalor wa duna ki Sub Centre wa i jngai ki chnong na kani ka PHC.
Da kdaw leh yei eh ki paidbah ha khappood na kawi ka sngi cha kawi lyngba ki bor yong ka aiñ na Assam, i booh ya ki Battalion Camp da ka sorkar Assam chapoh u pood u ang ka jylla Meghalaya, i pynkreh sarok yabor hapoh u pood u ang ka jylla da ka Assam tangwa neiliang ka sorkar wa kiwa mihkhmat paitke ki ya ini hadooh katni.
Hajrong kini ki phang wa kiwi kiwi de, da rai wow sai ya uwi u kyrtong na ka thaaiñ yow yoh wa mihkhmat cha ka Assembly kamwa da sai ya u MDC uwa katni uwa em yei kitkhlieh ya ka imlang sahlang ha i bor wa khian hapoh ka District Council, wei neibynta u kyrtong MLA daw pynyieñ won sa uwi, da ong ka khubor wa da pynlait da u Secretary ka Raij Namdong u Isidorius Pakma.
