15 49.0138 8.38624 1 0 4000 1 https://wyrta.com 300 0

Pynkhreh ka sorkar wow pynbiang ya ki mar baam ha ki sngi khang chnong

0 Comments
Advertisement ad1

Shillong: Ka sorkar Meghalaya Democratic Alliance (MDA) ynne da pynnan ko ya ka yalang wow yaklam hajrong kammon wow pynbiang ya ki mar baam iwa man iwa kongsan ya ki paidbah ka chnong.

U Symbood Montri Rangbah ka Meghalaya, u Prestone Tynsong da ong u wa ka sorkar da pynkhreh ko wow pynbiang ya ki mar baam neibynta ki paidbah, wei da rai wa ki Public Distribution System (PDS) u lai ki kamwa man man ki por wei daw saam noh ya u khoo neibynta u bnai Wisu (March) wa Naitung (April).

Da pyntip u wa ka sorkar jylla da paan chooh chooh ko ya i bhah yong ki mar baam na ka sorkar pyrdi neibynta u Naisan wa Naiynru.

Chooh chooh da pyntip u wa neibynta i emkaam ki wym haap hapoh ka thup PDS, ka sorkar da chimkhia ko wow yakular wa kiwa khayi wa ym em i duna, wei da kdaw wa em 23 tylli i emkaam wa ka sorkar da booh ko hakhmat dooh, wa kynthup ya u khoo, u dai, i phniang wa kiwi kiwi, wei daw pyntikna wa i pynpoi ya kini ki mar baam toh kiwa biang.

U Prestone da ong u leh wa ka sorkar da rai ko wa ha ki thaw sor kam ha Shillong, Tura wa Jowai daw pynpoi ya ki mar baam cha ki chnong, wa ki dorbar chnong daw pynbait ki wa ki Deputy Commissioner ya ki por wow saam ya kini ki mar baam khnang wow lait na i yaknieh næ wym yalang ki paidbah. Katwa cha ki thaaiñ palatsor won ka chnat Food and Civil Supply daw pynpoi ko ya ki mar baam wa ki paidbah u yoh ki wow thied.

Heiyatoh wa ki jhoor na palatsor, u Prestone da ong u wa ka sorkar dang yaklam ko wa kiwa khayi wow lai thied ya ki jhoor wei wow leh da ka online wow pynpoi ha ki thaw wow dai.

Da kyntu leh ya ki wakreh ya kam kini ki kaam wow pyntikna wa pynpoi ki ya kini ki jhoor cha ki paidbah hadien wa thied ya ki.

Heijooh i por da ong chooh chooh wa ka sorkar daw pynbiang ko yei emkaam ki paidbah kam ha kini ki por wa em i khang chnong wei kani ka rai u pynkrehkaam noh nadooh 27 tarik uni u bnai, deiwa pynrap wa ha ka 26 tarik i khang chnong u lai bait i.

Advertisement ad1

0 Comments

Leave a Reply