Ha ka sien wa nyngkong wa khut pynlum pynlang ya ki Dolloi, ki Waheh Raij wa ki Waheh Chnong kiwa napoh ka Ri-loom Jaiñtia da Ka Synjuk Waheh Chnong Ri Jaiñtia ha ka 4 tarik uni u bnai ha Yungwalieh ka Dorbar Chnong Loompyrdi Iongpiah, Jowai, da wan wow embynta da kiwa boon ki waheh chnong, ki waheh na ki Raij deilang ki Dolloi na ki Elaka waphær waphær.
Ha kani ka yalang da yaklam hajrong ka hukum ka Supreme Court kawa da khang yei yadaw masi heiwa da pyntip yeini da ki BDO yong ki Block waphær waphær iwa da phah da ki Deputy Commissioner yong ki ar tylli ki District wym chah de u pynman yei yadaw masi hapoh Ri-loom Jaiñtia.
Deiwa em kani ka hukum da em leh ki Dorbar Chnong wa ki Raij kiwa da chah pyndam ka Yadaw Rong iwa da ktah ya ka dustur riti wa hikai ki longchwa mancha, kamtæ ka synjuk leh sñiawthooh ko yeini i chah ktah wei da lai yachem ko leh wa waroh ar ki DC ka Jaiñtia Hills yow kyrpaad wow pynyinsur yeini i khang pyrchah wow pynman yadaw masi da ka Supreme Court.
Hawa yaklam yatai hajrong kani ka mat da yoh yei e yumut na ki Dolloi, na ki Waheh Raij, ki Waheh Chnong, u Dolloi Raliang, Dolloi Shangpung, Dolloi Nongjngi wa na u Waheh ka Raij Tuber, u H. Phawa wa kiwi de ki waheh.
Heini i yaklam da ong wa ka JHADC kawa man kam kawa chna aiñ hapoh ka 6th Schedule toh u pynneh pynsah ko ya ka riti dustur ka jaitbru deiwa chna aiñ ko yow lait nei chah pyndooh pyndam ha ki bor ka aiñ yong ka sorkar jylla wa sorkar India.
Da chim yei rai wow pyntip cha waroh ki Elaka, ki Dorbar Chnong u pynkhreh pynbiang ki ya ki riti dustur kamwa da hikai da ki warim yow lai booh ha ka Council yow phah pynman aiñ ya ki wei lada dooh yeiwa hikai ki warim ym yohsa wow lai pynsñiaw wei lai kyrpaad chadooh ka Supreme Court khnang yow lait ka jaitbru u dooh ya ki kaam niam, ki dustur riti wa hikai u warim wajah.
Da yaklam leh heiyatoh wa ka hukum ka Supreme Court kawa da khang wow tia cha rood ki sarok National Highway deiwa booh dukan, chna yung wa kiwi de. Wei heiyatoh wa ini da kyntu wym toh u yaleh pyrchah neibhah dang toh i hok ka PWD wei ymtoh leh wow chna dukan wei chongdai hajrong Footpath ha ki yaaw ki haat.
Hajrong ini da iwi i sur da chim rai wow ya krehlang waka sorkar wei ym yaleh pyrchah kiwa chong chnong yow suk ya i hi yow lait na iwon iwon i mynsoo mynsnaam hei lai i wan kamjooh yow pynkyllooid ya ki luti syngkieñ yow suk leh ki khynnah skur yow lait nei khynnia.
Ha kani ka sngi da yoh leh yei yaklam ya phyllu bniah heiyatoh wa kiwa boon ki kaam neibynta u wanrah yei yatylli wei ya krehlang ha ki kaam roi kaam paar ha sor wa cha palatsor kamjooh wow kyntu kyrsu biang yei maya wei yatylli hapoh ka Ri-loom Jaiñtia ha ki liang waroh.
Discussion about this post