Shillong: Hadien wa u Chairman ka Khasi Hills Autonomous District Council (KHADC), u Pynshngain N Syiem da ujor u cha ka kachari Meghalaya High Court ya i thmu wow pynman ya ka Election wow jied Chairman wa thymme ha KHADC, ynne ka sngi neiliang ka kachari lyngba u Justice Ranjit Vasantrao More da pynksan ko ya i ujor u PN Syiem deiwa pynmih hukum wow phah sangeh chwa ya katai ka thmu wow jied Chairman kawa da booh wow man mynstep ka sngi.
Ynne ka sngi neiliang ki MDC ha ka kynhun United Democratic Alliance ha KHADC da lai ki wow synran ya u Pyniaid Sing Syiem wow thap pyrtuid neibynta katai ka kaam, tangwa ini i thmu da sepai noh hadien wa ka kachari da pynmih ko yaka hukum wow pynsangeh noh chwa.
Hawa klam ynne i janmiet, u PN Syiem da ong u wa ka kachari da pynsangeh ym du yaka Election Chairman ha KHADC, wot hadooh i pynbna wa da pynmih da ka District Council Affairs (DCA). Da ong u wa kam u Chairman uwa da chah jied ha ka dorbar, ym em chah pyndam u na i kaam Chairman katkam ki kyndon, tangwa ini i pynmih hukum ka DCA wow pynman ya ka Election Chairman man ko kam wow yoohbeiñ ya ki kyndon yong ka Sixth Schedule.
U PN Syiem da pynsñiaw u leh yei phylla wa ka DCA da pynkrehkaam ko ya i synchaar Administrator wot ha ka ophis u Chairman wei kawa thmu wow jied Chairman thymme khlem da ye u pynhaap ya u Chairman wa da jied ha ka dorbar, wei ini pynyoo yei bakla yong ka sorkar wa ka ophis yong u Lat ka jylla.
Ha kawi won ka liang u Pynshngain da ong u wa i long i man ha KHADC ym toh i doohnong ya ki paidbah, tangwa man ko ka yohnong wa ki paidbah u tip ki ya i bor wa laitlooid yong ka District Council.
Discussion about this post