U Montri Rangbah ka jylla, u Conrad K. Sangma ynne ka sngi hapoh ka yung dorbar da pynksan u yei rai ka sorkar wow chim ram, wei yeini da ong u hawa jubab yei yaklam hajrong ka mang tangka heiwa da em kiwa boon kiwa da kylli yei rukom pynlut poisa ka sorkar khamtam hawa chim ram na kiwa boon.
Da ong u wa iwa phylla wa kiwa boon ki MLA wa khñium yeini i chim ram toh pyn daki hi wa wan paan yow yoh sarok, u chna ya kiwa emkaam kamjooh yow sdang ya ki Block wa thymme.
Da ong u leh wa ki kaam chna sarok, chna skur wa kiwi de toh kiwa ye u leh du deiwa em poisa donhi. Wei ka sorkar da chim ram ko tangwa ym toh hadooh u pood wym ye de u kit neibhah ka sorkar pyrdi da booh kyndon ko hadooh katwon wa ye u chim ram wei da chim ya ka ram deiwa leh yeiwa chah u leh ym man i iwa bakla.
Da kdaw u leh wa ka poisa wa da ye u yoh ka sorkar lyngba ki Scheme ka sorkar pyrdi toh wa biang i kreh ya ki Scheme kam ka PMGSY, Jal Jeevan Mission (JJM) wa MGNREGA deiwa kreh chitom ka chnat PWD (Roads), PHE waka Community and Rural Development (C&RD).
Da pyntip u wa ka sorkar daw sdang ko yei kreh ha ki 40 tylli ki C&RD Block wa thymme ha kylleiñ ka jylla heiwa da booh T. 120 klur neibynta ki yung krehkaam wa thymme ki Block Development Office.
Da pyntip u leh wa da mang T. 350 klur neibynta ki thaw sumaar iwa ym jooh leh nachwa. Kamtæ yow leh waroh ini da emkaam wow yoh poisa.
Heiyatoh waka chnat Bordiñ da pyntip u wa i yaphær hapyrdi iwa pynlut wa i yoh nong toh iwa boon iwa da poi hadooh 30% iwa heh dooh hapoh ka ri.
Yow lait na ini i dooh nong da leh yeiwa phah ka sorkar India wow pynemkaam da ki Smart Meter yow lait u dooh nong hawa kheiñ ya ka bai bordiñ.
Wei ka sorkar leh da phah ko yaka DPR yow yoh T. 2600 klur hapoh ka Scheme thymme ka sorkar pyrdi wei da dep leh wow su 90% ka ram wa dang sah ka chnat bordiñ.
Da khana u leh wa ka sorkar u pynlut ko T. 1200 klur yow pynku kyrdan ya kiwa boon ki skur waka puræ puthi.
Daw yarap leh ya palat 1000 tylli ki skur wa khian kiwa emkaam poisa yow pynchna pynmiat ya ki yung skur.
Da ong u leh wa ka sorkar daw pynchna ko leh ya ki yung krehkaam ki Deputy Commissioner, ki Police Station heiwa da booh T. 100 klur wow leh yeini nadooh wow chna ya ki yung krehkaam ki SP.
Kamtæ da ong u wa ka sorkar ym toh kawa da biang dooh nadong chadong tangwa da booh ko ya ka yurim waka luti wow lai ka jylla chakhmat.
