U Montri Rangbah ka jylla, u Conrad Kongal Sangma da ong u wa i pynman ya ki tamasa namo ki Festival toh iwa emkaam bha neibynta wow pynku ya ki kaam uiñke suwari hapoh ka jylla heiwa da ong u wa hajrong ki tamasa wow pynwyrngia, ka jylla daw pynman ko leh ya ka Literary Festival heiwa kiwa thoh kot wa pawnaam ka ri India daw chimbynta ki.
Ka jylla daw pynman ko ar tylli ki tamasa ha uni u bnai wei kawi toh ka ‘Me.gong Festival’ ya kawa da pynman ha Ri-loom Garo nadooh ka 16-18 tarik wa ka ‘Cherry Blossom Festival’ ka wow man nadooh ka 25-27 tarik ha nongbah Shillong.
Hawa kylli ya i chah ktah heiyatoh wa i pynlut poisa, u Conrad da ong u wa em i chah ktah neibhah wa em i duna poisa ka jylla, tangwa da pynksan u yeini deiwa ong wa ini ym mut i wa daw sangeh noh ki kaam, neibhah wa ka sorkar hap pait ko liang wanang khamtam neidaw wa em kiwa chong chnong ka jylla kiwa chaniah ha ki kaam uiñke pyrthai.
Heiyatoh wa ka kjut khñiang COVID-19, da ong u wa ka sorkar dang pynyinsur chooh chooh ko ya ki kyndon khamtam kiwa wan uiñke kiwa dadep chim tika ar sien deiwa kyntu leh ya ki paidbah ka jylla wow pyndep ki yei chim tika.
