Ampati: U montri rangbah ka jylla u Dr. Mukul Sangma ynne da wai u ya ka Koch Cultural Centre-cum-Museum ha Ghasura, Ampati heiwa da pynksan u wa emkaam wow pynim ya ki rukom man ki bru khian paaid hapoh ka jylla.
Kani ka yung da chna hapoh ka kyndon Article 275 (1), da ka Ministry of Tribal Affairs, Government of India hei lut wa kamwa T. 50 lak wei da pait da yoo ya ka da ka Meghalaya Koch Association, kawa em ya ka Headquarter ha Ampati.
Ha kani ka yalang wai ya kani ka yung da em u DC ka South West Garo Hills u Cyril Darlong Diengdoh, u Executive Member, GHADC, u Nripen Koch, ADC & PD, DRDA, HDB Sangma, kiwa kitkaam ka Meghalaya Koch Association (MKA) wa kiwi kiwi.
U Sangma hei klam da ong u wa em chiboon ki jaitbru kiwa ym ye ki u pynneh pynsah ya i rukom im tynre yong ki iwa da ktah joor ya i rukom man kyntang yong ki heiwa da kyntu u ya ki dkhot ka Koch Association wow pynchlur ya ki khynnah wow tip ya i rukom im tynre yong ki.
Ya kani ka yalang da pyllai da u Cyril Darlong Diengdoh uwa da ong wa iwa emkaam dooh toh wow pynneh pynsah ya i rukom man tynre ki jaitbru deiwa yooluti wa kani ka thaw u yarap ko wow pynneh pynsah ya ini.
Kiwi kiwa da klam ha kani ka sngi toh u EM, GHADC, u Nripen Koch, u ADC Ampati, H.D.B. Sangma wa u General Secretary ka MKA, u Surbit Koch uwa da batai leh yei daw wa chna ya kani ka yung.
Discussion about this post