U Symbood Montri Rangbah ka jylla uwa pait ya ka chnat Home (Police), u Prestone Tynsong da pynksan u yei leh ki pulit wow bom ya ki bru heipor wa man ka yakhih pyrchah ya ka karkhana deiwa pynbaad wa ki paidbah leh khyrwit ki ya ki pulit.
Kam wow kdaw heini wa ha ka 24 tarik u Naisaphra da mih i pyrchah yong ki paidbah ya ka Public Hearing yong ka Meghalaya Cement Limited (MCL) neibynta wow pynheh ya i bor wow pynmih khyndaw-bilat ka Topcem kawa em ha chnong Thangskai, East Jaiñtia Hills District.
Hajrong ini neiliang ka Meghalaya Human Rights Commission (MHRC) da chimkhia ko yeini hadien wa yoh ka ujor na u Joannes JTL Lamare, wei ka MHRC da phah ko ya u Director General of Police (DGP) wow thung ya ka takit wow khlieh da u heh pulit uwa em ya ka kyrdan Deputy Inspector General of Police, wei wow pyndep ya ka takit hapoh 15 sngi.
Hawa klam ynne ka sngi, u Prestone da pynksan u deiwa ong wa ymtoh u ong wa du wa chah bom ki paidbah ha ki pulit, toh u pait leh ya ki pulit kiwa da chah khyrwit ha ki paidbah.
Da ong u wa katkam ka riti synchaar ka sorkar da e laad ko wow yakhih, neibhah em ka hok wow yakhih wei wow pyrchah tangwa emkaam wow lai da ka luti wa biang.
Discussion about this post