Ynne ka sngi kawa man ka sngi wa ar yong ka Dorbar Mang Tangka ka JHADC, hadien wa ap yei sñiaw ki MDC (liang pyrchah wa synchaar), u CEM ka Council da ong u wa kani ka Mang Tangka man ko kawa biang dooh lada wyrchaw wa kiwa dadep.
Yeini i biang da ong u toh wa rap duna ko ya kawa da wanrah ha u snem wa dadep (2020-21) kawa man kamwa palat T. 19 klur i duna wei ha uni u snem won (2021-22) won man ko du T. 13 klur tam donhi i duna.
Da ong u wa yeini da leh kam chibynta wow pynduna hiwot yei lut sepai ka poisa ka Council weiwa ymye wow pynbiang pyntoh kat iwa kwah ki dkhot (MDC) ka Council.
U Thombor da pynbaad u leh wa lada em i thut heiyatoh wa i yoh poisa ka Council toh du neidaw wa em ki MDC ka JHADC kiwa thoh cha Delhi wow pyndooh ya ka yarap poisa cha ka Council wot hadooh wow poi cha ka yung bichaar da ki MDC ka BJP iwa da pynthut ya i rukom krehkaam ka Council.
Da beiñ u leh ya i paan RTI ki MDC deiwa ong wa lada man kam kiwa mihkhmat paidbah hapoh ka jooh ka yung neiyi i daw wa emkaam wow pynboonkaam u paan da ka RTI neibhah hapoh ka yung emkaam yei yakrehlang donhi.
Hajrong ki ar chnat wa thymme wa kynthup ya ka Fisheries wa Agriculture, u Thombor da ong u wa kat ya ki wakreh daw thung pyn da kiwa da kreh chwa ha ka Council.
Da ong u wa hanlada em ka Lockdown ha u snem wa dadep, ka EC wa ka Council kamjooh ki wakreh yong ka, ym em sangeh ki wow kreh hanlada em ki kyndon wow pynduna ya ki wakreh da ka sorkar neibhah da ye wot wow pynkhreh ya ka Annual Accounts ka Council neibynta u snem 2017-18.
Da pyntip u leh wa ka Council daw thung noh ko ya kiwa bichaar hapoh ka JHADC nadooh i kyrdan Judge wa Magistrate u thung noh pyn ha kini ki bnai.
Heiyatoh wow pynku ya ka yarong poisa ka Council, u Thombor da ong u wa ka EC da rai ko wow pynku noh ko ya ka bai Court Fee heiyatoh wa ki mukotduma ha ka Council wei dang yang yei rai na ka sorkar wa u Lat.
Heiyatoh wa ki dak thoh wa da wanrah, u Thombor da ong u wa kyrmen skem u wa ya i esikai neibynta wow tip ya ki dak ye wow pynpsiah ha ki Class khian ki skur.
Hajrong wa duna ka poisa ka Council, u Thombor da kyrmen skem u wa dei lilam ya u mooyong wa 17 lak Metric Ton, ka Council daw yoh yarap bha ko wow pyndap yeiwa duna khamtam heiyatoh wa ka tulop.
U Thombor hawa pynkut yei klam da kyntu u ya ki paidbah wa khamtam ka liang pyrchah wow wan yaklam heiyatoh wa ki kaam ka Council neibynta i bha i miat ka Ri-loom Jaiñtia hi waroh kawi.
