U Montri Rangbah ka jylla, u Conrad K Sangma, ynne da wai u yaka CM CARE heijooh i por leh da wai u yaka State Convention of Frontliners wa da pynman ha SICPAC, Shillong deiwa emlang leh u Montri ka chnat Social Welfare, u Kyrmen Shylla.
U Conrad hawa e yei klam da ong wa kiwa kreh Anganwadi deiwa emlang ki wakreh ka chnong deiliang ki Village Organization da man ki kam ki bru wa wanrah yei kylla hapoh ka imlang sahlang nadooh neibynta ki khynnah wa ki manbei ki chnong ki thaw, kamtæ da e khublei u yaki waroh.
“Ini i pynku yaka Honorarium toh i dak wa khian wow pynyoo yei sñiawngooh yong i yei chakri phi yaka imlang sahlang deiwa kreh phi khlem da pyrkhat yei yong idæ kamtæ i leh kwah i wow e yei kyrchaan ya phi,” da ong u Conrad deiwa pyntip leh wa waroh ki Anganwadi Center daw pynkylla ki cha ki Early Childhood Development Centers deiwa pynbiang leh ya ka yung ka sem, ki tiar ki tar deiwa e sikai leh yaki manbei kamjooh.
U Montri Rangbah da pyntip u wa i su namo ka Honorarium kiwa kreh Anganwadi (AWW) da pynku da T. 1500, ya ki Mini AWW da T. 750 katwa ki Helper won da T. 500 chi bnai iwa u kheiñ nadooh ka 01-10-22.
Ha kani ka sngi da wai u leh yaka CM CARE kawa jooh tip kam ka Chief Minister’s Social Assistance Scheme neibynta kiwa tlot bor, ki manbei wa samen, ki bru wa duna hei doh i pran, wei ha kani ka CM CARE (Comfort, Assist, Respect, Empowerment) daw e leh sa ka poisa yarap kawa T. 750 iwa da pynku naka T. 500 chi bnai iwa daw kheiñ nadooh ka 01-10-22.
U Montri Rangbah da saam u leh yaka khusnaam State Best Award cha ka South West Garo Hills wa Ri-Bhoi District kiwa da ye u pynduna yei duna baam wa tei namo ka Moderate Acute Malnutrition (MAM) waka Severe Acute Malnutrition (SAM) hadooh 90%.
