Ha ka Dorbar Synrai namo ka Autumn Session ka Meghalaya Legislative Assembly kawa da sdang ynne ka sngi, da kynmoo warom leh ya kiwa mihkhmat paidbah ka jylla kamjooh ka ri kiwa da khlaad noh ha kini ki bnai wa da dep heiwa ka jylla da dooh ko leh ya ki MLA warim kam u Obil Kyndait, u Mihsalan Suchiang wa u Dr. P.W. Khongjee.
Ya ini i kynmoo warom da yahkhmat da u Montri Rangbah ka jylla u Conrad K Sangma iwa da chimbynta leh da uwa yahkhmat ka liang pyrchah u Dr. Mukul Sangma, u P.T. Sawkmie, MLA ka Mawlai, u Mayralborn Syiem, MLA ka Nongpoh, u Charles Pyngrope, MLA ka Nongthymmai, u Wailadmiki Shylla, MLA ka Jowai, u Zenith Sangma, MLA ka Rangsakona, u Himlaya M Shangpliang, MLA ka Mawsynram, u James Sangma, Montri ka chant Bordiñ, u Lahkmen Rymbui, Montri ka chnat Poh Yung, u Sniawbhalang Dhar, Montri ka chnat Pynroi Sor, u Metbha Lyngdoh, Lamphang ka yung dorbar wa kiwi kiwi de.
Hawa e ki yei klam, waroh da kynmoo tympang ki ya kiwa da khlaad deiwa khana leh yei rukom man yong ki kam kiwa mihkhmat paidbah kamjooh kam ki lok wa kiwa ya krehlang. Da phah ki leh ya ki khubor sñiawlem cha kiwa hayung hasem kiwa da khlaad.
Da pynman leh yei suki kiaw ar minit kam chibynta wow kynmoo warom ya kiwa da khlaad.
Neiliang u MLA ka Jowai, u Wailadmiki Shylla hawa e u yei klam e sñiawlem khamtam cha u para MLA u Nujorki Sungoh, uwa da dooh noh ya u pa yong oo u (L) Mihsalan Suchiang. Da ong u wa da yieñ u ym wow pynkynmoo ya ki kaam wa da dep u (L) Mihsalan wow leh tangwa wow pynkynmoo ya kiwa angnood u kiwa ym pu em mankaam hadooh katni.
U Wailad da ong u wa iwi na ini toh wow pynku kyrdan noh ya ka Laskein Block cha ka Sub-Division kawa man leh ka phang wa u (L) Mihsalan da boon boon sien da wanrah u hakhmat ka dorbar nadooh u snem 1993 hadooh u 2007 heiwa katni da pteiñ won da u khon yong oo wow beh ya kani ka thong.
U MLA ka Jowai da pynkynmoo u leh wa ya ka Laskein Block da seiñ nadooh u snem 1973 wei da pait ko ya palat 1 lak ngut ki bru wa palat 100 tylli ki chnong, kamtæ da ong u wa iwa khian dooh iwa ka sorkar jylla ye ko wow leh yow pynyoo yei burom ya uni uwa yahkhmat warim ka Ri-loom Jaiñtia toh deiwa pynku kyrdan ya ka Laskein Block cha ka Sub-Division.