Ka sorkar hapoh ka yalang ki Montri namo ka Cabinet Meeting ynnin ka sngi da rai ki wow pynkylla ya ka Meghalaya Secretarial Services Rules 1992 heiyatoh wa kiwa embor wow jied ya ki bru namo ki “Appointing Authority” neibynta ka kyrdan Superintendent, Under Secretary wa Deputy Secretary kiwa nachwa da leh da u Governor tangwa kattu daw leh da kiwa ksoh yei kyrdan Chief Secretary.
Da mynjur leh wow pynkylla noh ya ka kyndon Sub-Rule (3) ka Rule 7 ka Meghalaya Agriculture Engineering (Mechanical) Services Rules deiwa pynku naka 25% cha ka 30% neibynta wow pynku kyrdan hapoh ka chnat neibhah ha kiwi ki chnat da bood da ka 30%.
Ini mut wa manda lait kaam, ye wow pynku kyrdan pyn hapoh ka chnat hi heithaw wow khut yaleh kreh thymme.
Da mynjur leh wow pynkrehkaam yei pynku ya ka tulop namo ka Revised Scale of Pay ka All India Council for Technical Education (AICTE) neibynta kiwa sikai ha Shillong Polytechnic wa kiwi de kiwa da chah kyrriah (Transfer) cha ka Directorate of Higher & Technical Education.
Kani ka Pay Scale toh kawa rap heh neiwa su hapoh ka jylla wei kani man ko leh ya ki 32 ngut kiwa sikai kiwa da biang katkam ka kyndon ka AICTE wei daw yoh ki leh da ka tulop (Pay Scale) ka AICTE.
