Uwi u pharæng da pynkulmar u ya ka yaaw wa em ha Varanasi wa tip kam ka Saptasagar Medicine Market kawa dang haap hapoh ka Kotwali Police Station iwa da jia ynnin ka sngi heiwa da psiah kulmar u chapoh ki yung ki sem ki bru deiwa kawang ya ki tiar ki tar kat chwa yoh hadooh wa hap khut pulit.
Da suba wa uni u bru toh uwa da muaid bhang tangwa ym pu ye u pyntikna da ki bor ka aiñ.
Ki Video wa mih na kani ka thaw da yoo ya uni u pharæng wa kbai wa kyrha u cha luti syngkieñ, da kynthih wei tia u leh chajan ki bru.
Manda psiah u ha iwi i yung, da ksoh noh oo ya uni u bru da kiwa boon ngut wei da e kti cha ki pulit.
Uni u bru da pteiñ wow pynkhor bru wei da chah thaap chah dat u ha ki bru wei em iwi leh i bynta wa uni u bru da kdong u hadooh ya ki ksaw wa em cha luti.
Ini waroh da neh i rap slem heiwa uni u bru nynykong da phet u chawah chaneiñ hadooh wa da tieñ ki bru wei manda psiah u ha iwi i yung, da ku rana u cha ki mala wa chaneiñ wei da ong u ya kiwa bood ya oo “Go Away”. Hapoh yung da noh da kawang u leh ya ki tiar wa em ha ini i yung.
Heini da pyrchang wow yaklam wa uni u bru tangwa dang man bait u kam uwa da chongchit wei chrai biej hadooh wym yohsa ki wow beh wow taan oo cha lait.
Ha ini i por dapoi ki pulit tangwa uni u bru dang pteiñ hi u wow kbai u awri wei wow lai chawah chaneiñ wei da ong u ya ki pulit ‘Go Back’ manda mut ki oo u rah.
Hadien wa ye u kem ya uni u bru, da lai booh oo cha Kabirchaura Divisional Hospital yow leh ya ka Medical Examination wei ka takit dang lai ko chakhmat yow tip yei daw wa jia ini waroh.
Ki pulit dang yaleh ki leh wow tip na kawon ka ri uni u bru wei kamjooh i pyrtuid u.
Discussion about this post