Jowai: Kam i dak u pynsñiaw yei sarong yow khon yong ka chnong uwa da wanrah yei naam i burom yong ka chnong, ka Ladthadlaboh Dorbar Chnong, Jowai ynne ka sngi da pynkup burom ko ya u Dr. W.R. Kharlukhi uwa dang dep chah jied kam u dkhot ka Parliament cha ka Rajya Sabha haka yalang wada pynman ha Conference Hall ka Ladthadlaboh wa pynlai da u K.D. Syngkon, Asst. Waheh Chnong hei emlang kiwa yahkhmat ka chnong waki kattu katni ki bru waheh ka chnong.
U Dr. W.R. Kharlukhi toh uwa chong chnong wa da heh da san ha Ladthadlaboh wei hanla da chong da sah u cha Shillong leh i emyatoh yong oo waka chnong won dang neh ko hadooh ynne ka sngi.
Ka Dorbar Chnong da pynkup burom ko ya oo da ka Ryndia Tlem, ka sahkti wa ka Memento heiwa de e kti da u L.D. Lakiang Waheh Chnong, Ladthadlaboh.
Chwa u poi ka pali pynkup burom, neiliang u waheh chnong kamjooh kiwi won kiwa yahkhmat ka chnong da e ki yei kyntien ehbok ehnasib neibynta i lai luti wa chaphrang yong oo nalor wow nang yoh u yei stat i chemphang yow ye u e i chakri wa bha tam yaka jylla waroh kawi.
Kiwa klam nadooh u Chairman ka LYSO u D. Shylla wa ka Chairperson yong ka LWO ka D. Lyngdoh da pynsñiaw ki yei lai luti yong ki hapoh i pait ka Dorbar Chnong wei kyrpaad ki leh na oo wow e i kyrchaan khnang yow ye ki u chakri rap bha yaka chnong ka thaw.
Neilang u Dr. W.R. Kharlukhi hawa e yei klam pynsñiaw u i kmen wakhroo deiwa ong, “Hei lai luti ye u yoh chiboon i pynkup burom tangwa katwon man iwa pynsñiaw thiang tam ya nga hawa ka chnong kawa nga da heh da san wei chna dur yei im yong nga chim ko wow pynkup burom ya nga”.
Kamtæ kamwa da jied ya oo wow kit ya kani ka lyngkor, ong u wa neini chakhmat u pyrchang u katwa ye u wanrah yei kylla wym du haka chnong ka thaw yong oo tangwa yaka imlang sahlang hi waroh kawi. Wei heiyatoh wa i kyrpaad wada pynsñiaw hakhmat yong oo daka Dorbar Chnong, ong u wa kat wym toh u bru wa jooh myllien u kular kamtæ katwa joh i bor yong oo daw pyrchang hi u.
Kiwi won wa e i klam kynthup ya ka Dr. Doricia Pariat, u ABM Shullai, General Secretary, Ladthadlaboh, u J.M. Paswet Finance Secretary wa kiwi.