Shillong: Ka sorkar jylla ha ka 12 tarik u Wisu uni u snem da mynjur ko ya ka Meghalaya Drug Abuse Prevention Policy, 2020; kani toh ka Policy wa nyngkong wa ka sorkar da wanrah ko dei thmu wow pyndooh syndon ya i roi i drug hapoh ka jylla wei wow yarap leh ya kitu kiwa da chah kdoh ha ini u dih pynmuaid.
U Montri wa pait yaka chnat Social Welfare ka jylla, u Kyrmen Shylla da ong u wa lyngba kani ka Policy ka sorkar daw pyndep ko leh ya ka Deadiction Centre næ ka thaw yasyllok kawa da lai katni i kreh ha Mawdiangdiang deiwa ya krehlang wa ka Kripa Foundation.
Da ong u wa neiliang ka sorkar da pyrchang ko wow pynbiang ya ki thaw ya syllok khamtam neibynta ki khynroo kiwa da toh ha i dih muaid, wei dang lai chakhmat leh wow chna chooh chooh yaki thaw ya syllok.
Hawa kylli, hajrong i em kiwa dih drug hapoh ka jylla, u Montri da ong u wa lyngba kani ka Policy ka chnat dang lum yukheiñ ko ha East Khasi Hills, Jaiñtia Hills wa West Garo Hills.
Da ong u wa i yoh lum yukheiñ da ka chnat da chem wa ka jylla Meghalaya dang duna kiwa pynemkaam ya ki drug, tangwa da i wanrah ya kani ka Policy, ka sorkar da booh thong ko wow pyndooh jait syndon ya i roi i drugs.
