Ka North Liberty Higher Secondary School Jowai kam chibynta i pteiñ lehkmen yei dap 25 snem i lai luti, ynnin ka sngi da pynman ko ya ka yalang lehkmen wow e khublei kyrpang ya waroh kiwa embynta u yarap u kyrchaan hadooh wa man kani ka skur kamwa man katni, heijooh i por leh da pynkup burom ko ya waroh kiwa da Pass ya ka Class-XII yong uni u snem 2025 ha ka Arts wa Science Stream wa kynthup nadooh kiwa yoh u psiah hei kyrdan Top-10 ha ka jylla wa ki wym yoh u psiah.
Ya kani ka sngi da tip kam ka Silver Jubilee Thanks Giving Ceremony cum 12 Felicitation Ceremony, heiwa u T.R. Laloo, Director Accreditation & Controller of Examinations MBOSE da wan u wow emlang kam u kongsan, u Pastor Khadarbor Rapsang, Balang u Krist Mawlai Nonglum kam u symbood kongsan, hei emlang ki manbei manpa, ki khynnah skur wa katni, kiwa Pass wa kiwa chah khut sñiawbha.
Najrong i e burom ya waroh kiwa embynta u yarap u kyrchaan ya ka skur haki liang waphær waphær, da pynkup burom haroh ya kiwa yoh Topper ka skur na ki snem cha ki snem.
Ka Award wa rap kyrpang ha kani ka sngi toh ya u Mendelson Langstang u khynnah puræ na kani hi ka skur, hajrong i Pass u yaka Exam JEE Advanced-2025 deiwa yoh ya 424th All India Ranking.
Yei bynta e khublei ya waroh kiwa embynta nadooh wa sdang ka skur hadooh katni da klam pynsñiaw da u Principal ka skur u Richard Uriah.
Neiliang u T.R. Laloo kam u kongsan hawa klam ong u kani ka sngi ym du wa man i lehkmen yei dap 25 snem ka skur tangwa i lehkmen leh yei emyatoh kani ka skur haki bynta waphær kam i yatoh ka MBOSE wa kani ka skur, i yatoh u Principal kiwa sikai wa ki khynnah skur ki bei ki pa wa kiwi kiwi ki bynta.
Da ban joor haroh u ya ki khynnah skur wow man kiwa tip u sñiawngooh nyngkong yow Blai wa yoh yei im hadooh katni, u sñiawngooh ya ki bei ki pa wa lyngba yong ki yoh ki u thooh stat ha kani ka skur, u sñiawngooh ya ki bor ka skur, ka chnong ka thaw wa kiwi kiwi ki bynta.
Discussion about this post