Ka National People’s Party 1-Nartiang Constituency West Jaiñtia Hills Distrcit ha ka 7 tarik uni u bnai da pynman ko yei pynkup burom ya ki 4 ngut ki MDC yong ka Party kiwa da yoh yei jop ha ka Election MDC cha ka Jaiñtia Hill Autonomous District Council ha uni u snem kiwa kyntup ya u Thombor Shiwat na 8- Moodop Umladang Constituency, u Jesse Suiam na 6- Moodymmai Nongkhroh Constituency, u Pheinshwa Nanglein na 10- Mynsngad Khanduli Constituency wa u Reforming Son Lamare na 7- Nartiang Wahiajer Constituency.
U Thombor Shiwat hawa e yei klam da e khublei kyrpang u ya ki paidbah wa kyrchaan ya ka Party wa khamtam ya u Deputy Chief Minister uwa man leh kam u MLA ka thaaiñ, u Sniawbhalang Dhar kamjooh yeiwa kreh chitom yong waroh hadooh wa jop emburom hanla ka yaleh man ko kawa jwat bha ha waroh ki Constituency.
U Sniawbhalang hawa e yei klam da pynkymmoo u ya waroh ki MDC yei emkaam wow kreh chitom wei wow yarap u wanrah myntoi ya ki paidbah ha kiwon kiwon ki rukom yow ku yow roi ka Ri Jaiñtia waroh kawi.
Da ong u leh wa emkaam u man kiwa yatylli wei wow kreh hok yeiwa da pynkit ha ki da ki paidbah wa jied ya ki.
Ya ka yalang pynkup burom da pynman ha Wahiajer Community Hall.
Discussion about this post