Ka National People’s Party 1-Nartiang Constituency ha ka 1 tarik uni u bnai da pynkup burom ko ya u Sniawbhalang Dhar uwa da jop kam u MLA la soo sien khlem rem uwa da man katni kam u Symbood Montri Rangbah ka jylla kamjooh u Montri sorkar wa pait ya ka Commerce & Industries Department, Department of Prisons and Correctional Services, Transport Department, Urban Affair Department ha ka yalang wa da pynman ha Wahiajer Community Hall.
Ya ka yalang da pynlai da u Hamkom Kynriam, President ka NPP 1-Nartiang Block Constituency wei da sdang da i duwai na u Tbn. Sanwotki Laloo, Waheh Chnong ka Wahiajer. Da yoh ya ki kyntien pdiang sñiawbha na ka Phyrnai Sariang, Secretary ka Women’s Wing 1-Nartiang Constituency wa i chaad pdiang sñiawbha na ki khyllood ka chnong Wahiajer.
Neiliang u Briwon Pohshna, Advisor ka NPP 1-Nartiang constituency da e u ya ki kyntien maitphang deiwa yaroh ya ki kaam wa bha yong u Sniawbhalang Dhar ha kini ki snem wa da lai wei da kyrpaad u leh ya u MLA wow nang wahrah chooh chooh u ya ki kaam pynroi neibynta ka 1-Nartiang Constituency.
Da yoh leh yei rwai kyrpang na u Deibor Suting uwa na ka chnong Thadmusem iwa yatoh wa kani ka sngi wei da em leh i e sñiawbha kam i dak pynkup burom na ki le tylli ki chnat krehkaam ka National People’s Party 1-Nartiang Constituency nadooh ki chnat ki manbei, ki khynroo kamjooh na ka chnat heh.
Neiliang u Sniawbhalang Dhar hawa e yei klam da e khublei u ya waroh kiwa yahkhmat wa kiwa kyrchaan ka Party kiwa da kreh chitom wow pynjop emburom biang ya oo kattu hadooh 4 sien na kani ka Constituency.
Da ong u wa man ko i burom wa khroo ya oo wow man kam uwa mihkhmat neibhah da jied dei stat yong ki paidbah wa chong chnong ka Constituency wow pynjop boonsien wei katni kam ka Constituency da poi cha ka kyrdan Symbood Montri Rangbah yong ka sorkar Meghalaya.
Da pdiang u wa kam u bru ym ye wow leh lut nadong chadong katkam i kwah ki paidbah tangwa da pyrchang u katwa ye wow wanrah yei roi i paar ha ka Constituency katwa ye. Wei da kular u leh wow kreh chitom wei wow leh rap bha chooh chooh ya ka Constituency yow wanrah ya ki roi ki paar waphær waphhær wei wow pynku ya ka yoh ka kot, ka rep ka riang, ka puræ puthi, ka chait ka khiah wa kiwi kiwi de kiwa ka Constituency dang emkaam ko wow pynku chajrong.
Da pynkut ya kani ka yalang da ki kyntien e khublei na u Thombor Shiwat Chief Executive Member ka JHADC.
