Ka National People’s Party (NPP) da pynman ko yei pynkup burom ya ki ar ngut ki MLA wa thymme ka Party, kitæ u Pyniaid Sing Syiem uwa dang dep jop na Mawryngkneng wa ya u Abdus Saleh uwa dang dep jop na Rajabala ha ka Election chiteiñ samoi. Neiliang ka Party da pynkup burom ko leh ya u kyrtong ka Party na Mawphlang, u Lamphrang Blah ha ka yalang kawa da pynman ha pchem ka yung krehkaam ka Party wa em ha Lachumiere, Shillong.
U National President ka NPP uwa man leh u Montri Rangbah ha ka sorkar MDA, u Conrad Kongal Sangma hawa klam ha ka yalang pynkup burom da pynsñiaw u yei kmen, deiwa ong wa u Blai da kyrkhu u sa 2 ngut ki MLA wow pynkhlan chooh chooh ya ka Party wei kamjooh ya ka sorkar. Da e khublei u leh ya waroh ki wakreh ka Party kiwa da kyrchaan ya ka Party ha kiwa boon ki liang wow pyntikna wow yoh yei jop, wei kamjooh ya ki seiñ sainpyrthai kiwa synrop lang ha ka sorkar kiwa da e yei kyrchaan ya ka NPP ha Mawryngkneng.
U Conrad da ong u wa ini i jop toh i chaniah yong ki paidbah ka jylla ya ka sorkar wot hapyrdi i pyrchang wow yah bakla da ka liang pyrchah, wei pynrap u wa ka sorkar ka dang em ko boon ki kaam wa hap wow pyndep.
Ha i jooh i por da ong u wa ym man iwa suk wow yoh yei jop ha kini ki Constituency wa da jooh jop bait da ki MLA ka Congress kiwa em katni ha ka liang pyrchah. Chooh chooh da ong u wa ye wow man i por wa tbian neibynta ki MLA wa thymme, tangwa da pynrap u wa ym man iwa tbian lada kreh ki khlem sangeh neibhah wa dang em sa kamwa 500 sngi.
Neiliang u National Vice President ka NPP uwa man leh u Symbood Montri Rangbah, u Prestone Tynsong da ong u wa i jop yong ka Party toh iwa khlem poi pyrkhat, wei da pynrap u wa ka Party ka daw jop biang ko ya ka Election ha u snem 2023 wa kynthup ya ka Mawphlang Constituency.
Ha kani ka yalang da yoh leh yei klam na u Pyniaid uwa da ong wa hanla sah sa du 1 snem 4 bnai, tangwa kam uwa mihkhmat deilang wa ka Party daw e yei chakri kawa bha tam ha ini i por wa tbian, wei kamjooh daw khut ya waroh ki wakreh ka Party wow pynkhreh won ya ka Election 2023 khnang wow pyntikna wa ka NPP u yoh biang ko yei jop.
Neiliang u Abdus Saleh da pynsñiaw u yei sñiaw sarong wow man kam u dkhot ka NPP, wei da ong u wa ka sorkar wa yahkhmat da ka NPP ka da leh ko chiboon kiyi kiyi neibynta ki paidbah ka Rajabala, heiwa da em i kylla hapoh Rajabala neibhah ki kaam yong ka sorkar MDA da pynman ya ka NPP wow jop ya ka Election.
Ynne ki le ngut kiwa dang jop Election da pynsmai ya ki kam ki MLA ka Meghalaya.
