Yow tipmit yei kreh chitom ki khynroo khyllood hei puræ puthi wei wow e mynsien hei lai luti wa chaphrang yong ki, ynne ka sngi ka National People’s Youth Front Meghalaya State Unit lyngba ka NPYF Amlarem Block da pynkup burom ko ya 40 ngut ki khon khynroo khyllood ka thaaiñ Amlarem, West Jaiñtia Hills District kiwa da leh bha haka SSLC wa HSSLC ha uni u snem.
Ya kani ka yalang pynkup burom da pynman ha Syiem Jingsuk Hall Amlarem deiwa emlang u State Working President NPP, u Octomewot Lamin, u Block President uwa man leh u MLA warim ka Amlarem u Stephanson Mukhim, u Bajop Pyngrope, Chairman Regional Planning and Development Council kam u symbood kongsan katwa u Hopeful Bamon MLA warim ka Saipung Sutnga da man u kam u kongsan.
U Bajop Pyngrope hawa klam e mynsien ya ki khon khynroo khyllood ong u, u Blai da e u ka sap ha uwi pa uwi wei chong ha i won kammon u kreh chitom, ong haroh u ymtoh u mylliñ wa ka jylla yong i em ko chiboon ki laad ki kabu heiwa neiliang ka sorkar leh da yaleh ko u pynmih chiboon ki laad yarap ya ki khon khynroo wa kiwa chong chnong ka jylla kammon u sdang ki yei khih i kreh, khamtam haka juk kyrdooh kaam kyrdooh jaam.
U Hopefull Bamon hawa pyn-eh-daw ya ki khynroo khyllood kyntu haroh u wow nang lehbha chooh chooh chakhmat.
Neiliang u Eladmiki Suting kam u bru chemphang wa wan e i klam kyrpang cha kiwa puræ puthi heiyatoh wa kani ka sngi e khusnaam ong u, “Deiwa lehbha phi ha kani ka Result pynyoo ko wa da kaap phi cha kawi won ka bynta yong i im wei ki bru leh sdang ki u pait cha phi deiwi tawon i dur”.
Da ong u leh wa i lai skur wa waroh chi kattu, kattæ da yoo chynna yei dor yong ka lyngba i yoh pdiang ya kani ka Award.
Ong haroh u kamwa hawa im i kylla i nei man khynnah skur chei puræ wa heh kyrdan deiwa lai College, wei na kini kiwa chah pynkup burom daw chah pynkylla phi ha ki sngi ki por wow wan.
Wei hapyrdi kini ki kylla kyntu u wa toh u e laad wow pynkylla i yei kyrdan puræ wei i im wa em akor burom khnang yow ye u poi cha ka thong.
Heijooh i por da pynrap haroh u yei emkaam u sumaar yei chait i khiah.
Discussion about this post