Ynne ka sngi da pynman ya ka SHG Mega Camp ha Shangpung Moosyiem, West Jaiñtia Hills heiwa da pynman leh ya ka yalang kawa pynlai da u BDO ka Laskein, u Dr. Brightstar Langbang heiwa da pynkup burom leh ya ki kattu katni ki Self Help Group (SHG) ka thaaiñ.
Ha kani ka yalang da emlang u Montri ka chnat C&RD u Hamletson Dohling kam u kongsan, u Montri ka chnat i chait i khiah u James K Sangma kam u symbood kongsan, hei emlang u MLA ka Raliang, u Comingone Ymbon wa kiwi kiwi de.
Ha kani ka yalang da yoh ya ki kyntien pdiang burom na u DC ka West Jaiñtia Hills, u Garod LSN Dykes.
Neiliang u Comingone Ymbon hawa e yei klam da ong u wa katni da boon bha ki SHG ha ka thaaiñ wei emkaam ya ki wow krehchitom, u yakrehlang para SHG wei wow em i sñiawthooh yumut khnang wow ye ki u yoh myntoi bha wow pyndap yeiwa emkaam ha yung ha sem.
Kam u symbood kongsan, u James Sangma hawa e i klam ha kani ka sngi da ong u wa man iwa sñiawkmen wa da ye u pynman ya kam kani ka yalang da ka Meghalaya State Rural Livelihood Society (MSRLS) chi snem chwa wow dap 50 snem ka jylla.
Da ong u wa i pynkupbor ya ki kynthai man i iwa emkaam bha neibhah wa man i ka dak wa ka jylla da lai ko chaphrang wei man i iwa emkaam wa ka MSRLS da tia ko chaphrang wow pyntikna wa ki kynthai da yieñ ki wow khih u kreh.
Chooh chooh da kyntu u ya ki paidbah wow wan ki chaphrang wa i emkaam yong ki wei neiliang yong ka sorkar u yaleh ko wow pynbiang yeitæ wei i kaam leh toh i wow neh rta.
U Hamletson Dohling kam u kongsan ha kani ka sngi da ong u wa ka sorkar jylla ha u snem wow wan daw lehkmen yei dap 50 snem ka jylla wei ka sorkar lyngba ka MSRLS kwah ko wow lehkmen ya ini i dap snem deiwa pynman ya kam kani ka SHG Mega Camp ha kylleiñ ka jylla.
Da ong u wa ka sorkar da booh thong ko wow pynmih hadooh 44,000 tylli ki SHG kam i dak dap 50 snem ka jylla ki wow seiñ da ki kynthai khnang wow pynwiar yei dooh i duk.
Chooh chooh da ong u wa ka poisa wa yoh ki SHG ynne ym mut ko wow kut noh ki SHG tangwa emkaam wow pynemkaam hok ya ka poisa neibynta i myntoi yong ki hi deiwa kyntu wow man ki kiwa kreh chitom khnang wow ye u kyrchaan ya ki yung ki sem yong ki.
Ya kani ka yalang da pynkut da ki kyntien khublei na u Project Director uwa man leh u ADC ka District, u PK Boro.
Neiliang ki Montri da lai pait ki leh ya ki kattu katni ki dukan wa da booh da ki SHG.
Yei naam kam ki chnong wa boon SHG dooh deiwa kheiñ yei boon ki manyung, da e cha ka chnong Mulieh, Iooksi Kyan Mynsar Thlong Mu, Mowkyndeng, Pyntei wa Muthlong Rim.
Yei naam Best Performing VO da yoh ka Synroplang, Thadmuthlong-A.
Yei naam Best Performing FLC da yoh ka Banri Papiah, Sngewbhalang SHG na Thadmuthlong
Yei naam Best Performing ICRP da yoh ka Junemonth Suchiang, Dathranglang SHG na Shangpung Khliehmushut.
Yei naam Best Performing BC da yoh ka Emilia Sten.
Yei naam Best Performing Branch da yoh ka MRB Mowkaiaw.
Yei naam Best Performing Branch for Social Security Scheme da yoh ka MRB Shanpung.
