Shillong: U montri rangbah ka jylla, u Conrad K. Sangma, u symbood montri rangbah u Prestone Tynsong, u montri ka Tourism u Metbah Lyngdoh wa ki MLA na West Khasi Hills da chah pynkupburom ki ha ka Hima Nongstoin Land Owners, Coal Traders and Producers Association wow yaroh ya i ye ka sorkar MDA wow pyllait ya u mooyong hapoh jylla.
Kam u kongsan u Conrad K. Sangma da e khublei u ya waroh kiwa da embynta ha kani ka kaam khamtam ya ka Hima Nongstoin Land owners, Coal Traders and Producers Association, ki muktiar, wa ki paidbah kiwa da embynta bha ha kani ka kaam.
“Lyngba kani ka hukum ka Supreme Court, i hok yong ki bru ri-loom da yoh biang ki yei hok yong ki wei kani ka hukum u man ko ka wow sah khana parom yanom,” da ong u Conrad.
Da ong u leh wa boon ki bru ki wym sñiawthooh wa hadooh katwon khia kani ka hukum, heiwa man ko palat bar ya u mooyong, ki mar pohkhyndaw wa em ha i heiwa ki hok yong ki tre jylla man ki kiwa da tipmit.
Da ong u leh wa ka liang pyrchah da pyrchang ko yah bakla wei wow chim kabu yeiwa kreh chitom ka sorkar MDA wa kiwi kiwa emkti ha kani ka kaam wei ini man i iwa sñiawsih wa haap yang ki paidbah hadooh san snem iwa da ktah joor ya ki paidbah kiwa chaniah ya u mooyong.
Chooh chooh da ong u wa kattu da emkaam ya ka rukom krehkaam ka wow da wei wow pynneh ya ka rymaw neibhah da kreh waroh chi kattu wei i kreh toh u pteiñ i.
Da pynkynmoo u leh ya ki paidbah wow syndong wow sumaar ya ka rymaw khnang wow man ka mynried kawa yirngam.
“Iwa sñiawkhia ha nga toh yi wow jia manda lut u mooyong, u Blai da elaad u ya i ka sien wa ar wa ymtoh wow pynemkaam ware palat yeiwa da em.” Da ong u.
U Conrad da ong u wa ka dan wa yoh khrong da ku ko 20% ha u snem wa dadep hawa wyrchaw wa i yoh ka sorkar warim wei dang yaleh wow pynku ya ka cha ka 25% ha uni u snem.
Discussion about this post