15 49.0138 8.38624 1 0 4000 1 https://wyrta.com 300 0
Advertisement ad1

Pynkupburom ka Arkynhun Secondary School Mooriap ya ki le ngut ki khynnah skur yong ka

0 Comments
Advertisement ad1
Advertisement ad1

Jowai: Ka skur Arkynhun Secondary School Mooriap wa haap hapoh ka Elaka Sumer, East Jaiñtia Hills District, kam ka dak wow e mynsien wei wow pynchlur ya ki khynnah hei puræ puthi, ynne ka sngi da chim ko ka bynta wow pynkup burom kyrpang ya ki 3 ngut ki khynnah skur yong ka kiwa da pass haka result Secondary School Leaving Certificate (SSLC) wa dang dep pynbna daka MBOSE.

Ki le ngut wa da chah pynkup burom kynthup ki ya u Forward Tangliang, ka Pyndap Lamare wa u Kynjailang Salahe uwa da yoh haka kyrdan First Division deilang wa 3 tylli ki Distinction haka Subject Health Education, ka Khasi wa ka Social Studies.

Ha kani ka sngi pynkup burom da sakhi lang ki khynnah skur, kiwa sikai, ki manbei manpa, wa kiwi heiwa u Marry Dhar uwa man uwi uwa kyrchaan wa khroo ya kani ka skur da man u kam u kongsan.

Ya kani ka skur da seiñ nadooh u snem 2013 da ka Dorbar Chong Mooriap kawa em du kamwa 43 yung, wei napyrdi ki 18 tylli ki chnong wa marjan ka thaiñ Sumer toh du ka chnong Mooriap donhi wa em ya ka Secondary School.

Neiliang u Chairman ka SMC u R. Pasleiñ da khana u wa neiliang kiwa pynlai neidaw wa em sakhiat ki i angnood wow wanrah yei stat i tip haka puræ puthi, kamtæ da kreh dohyap ki wow seiñ ya kani ka skur hanlada haap wow su tulop ya kiwa sikai dei bor ka chnong. Heijooh i por da kyntu u ya ki bor sorkar wow pait wow yarap ki ya kani ka skur yong ki kawa dang em chiboon i duna.

U Marry Dhar hei klam e mynsien yong oo ya kiwa pynlai ka skur da ong u, wym ye u yoh yow soh yong uwon uwon u dieñ mar dep thung, tangwa emkaam chwa wow sumaar ya oo. Kamtæ hei pynlai yaka skur leh i jooh hi wei ymtoh u dooh mynsien, heiwa lyngba i kreh chitom kiwa sikai kani ka skur daw nang ye chooh chooh ko u yoh yow soh wa jop.

Da kyntu leh ya ki khynnah wa da pass na kani ka skur wow man ki kiwa syndong yei rukom im manda poi ha College khamtam ha sor neibhah daw yachem boon ki lok, khnang wa kawon kawon ka thong hei rta pyrthai u man ko kawa jop.

Heijooh i por neiliang kiwa sikai kiwa pynlai chnong da pyn-eh bok eh nasib ki ya kini ki khynnah hei puræ puthi wa chaphrang wei da ong ki wa kani dang toh ka dwar wa nyngkong wada kaap ki hei lai luti yong ki kamtæ emkaam u rap leh bha chooh chooh neibhah dang boon ki dwar hakhmat wa haap ki u kaap, neitæ ha chirup chirup i lai luti ka akor wabha toh kawa kongsan.

Neiliang ka skur ha kani kajooh ka sngi da leh burom ko leh ya uwi uwa sikai kani ka skur u E. Shylla neibhah wa da haap u wow mih noh na kani ka skur neidaw kiwi won ki kaam wa haap u wow lai chakhmat.

Advertisement ad1

0 Comments

Leave a Reply