Pynkupburom ka Dorbar Chnong Mukhla Pyllun ya u Sniawbhalang Dhar wa u Wailadmiki Shylla

Jowai: Ka Dorbar Chnong Mukhla Pyllun da pynman ko ya ka yalang pynkup burom ya u MLA ka 2- Jowai Constituency u Wailadmiki Shylla uwa man leh u khon khynroo ka chnong Mukhla wei heijooh i por leh ka Dorbar Chnong Mukhla Pyllun da pynkup burom ko ya u MLA 1-Nartiang Constituency u Sniawbhalang Dhar ynne ka sngi uwa jooh man leh u MLA kani ka chnong ha ki por wa da lai.

Ha kani ka sngi da em leh u MB Rymbai MDC Amwi Khliehtyrshi Constituency deilang wa ki dkhot ka Party NPP na ka District Level wa na ka Jowai Block Committee hei emlang u Secretary ka Dorbar Chnong Sohmynting, u waheh chnong ka chnong Madur, u waheh chnong ka chnong Wahiajer wa kiwi kiwi.

Ya kani ka yalang pynkup burom da pynlai da u President ka Dorbar Chnong Mukhla Pyllun u Eborlang Sari wei da yoh ya ki ktien pdiang burom na u Hachwa Suna uwa man kam u General Secretary ka Dorbar Chnong Mukhla Pyllun wei da yoh i klam leh na kiwa boon ki waheh chnong kam na Mukhla Nongrim, Mukhla Umlangshor, Ladmukhla kamjooh ki dkhot ka NPP.

U Sniawbhalang Dhar hei klam yong oo da e khublei u ya ki paidbah ka 2-Jowai Constituency kiwa da pynjop emburom ya u Wailadmiki Shylla kam u MLA yong ki wei kamjooh ya ka chnong Mukhla Pyllun, wei da kular u leh wow krehkaam wa u MLA ka thaiñ wow wanrah ya ka kaam pynroi hapoh ka Jowai Constituency.

Related posts

Pynbna ka VPP ya ki kyrtong MDC ha ka JHADC wa KHADC

November 13, 2024

Kyntu ki seiñ ki jaitbru ri-loom ka Manipur wow dam u chibynta ha ka Election District Council

November 13, 2024

Neiliang u Wailadmiki Shylla won nyngkong da e khublei u ya u Blai wa yoo biang ya oo wow man u kam uwa yahkhmat ka jaitbru wei da e khublei u leh ya kiwa kyrchaan ya oo kiwa da kreh chitom wow pynjop ya oo kamjooh leh ya kiwa pynjop ya u kong yong oo, u Sniawbhalang Dhar.

U Wailadmiki Shylla da kular u leh wow kreh chitom wow wanrah ya ka roi ka paar, u pynbiang ya ki sarok kari, ka um baam um dih, ki thaw sumaar wa ki thaw puræ sorkar kam ki College kamjooh ki kaam Sports wa ki kaam uiñke suwari.

Da ong u leh wa da pyrkhat u chaphang ki khynroo khyllood wow ye ki u yieñ hei kjat yong ki deiwa wanrah ya ki e sikai chaphang ini waroh lynba ki Skill Development Programme, ki Career Guidance wow yarap ya ki poi ki cha ka thong.