Ka Meghalaya High Court da pynkut ko ya ka mukotduma Public Interest Litigation (PIL) wa da yaleh pyrchah yei pyman yakob khwe dakha namo ki Fishing Competition heiwa da e daw wa kini ki yakob da pynthut bha ko ya ka imlang sahlang.
Ka yung bichaar da ong ko wa neidaw wa da em ki kyndon wa da booh hawa pynman ya kini ki Fishing Competition, neiliang u DC wa u SP hap ki wow pyntikna wa da bood thij ya kini ki kyndon.
Da ong leh wa i e NOC toh hadien wa da yoh ya ka Report na ki pulit kamjooh deiwa pyntikna ka chnat Fisheries wa Taxation heiwa ki kyndon toh wow pyndep ya ka yakob khwe hapoh i por wa da booh wei ymtoh leh u pynthut yei lai i wan ki kari kamjooh kiwa lai kjat wei toh leh u pyntikna wa da em ki thaw booh kari wei kiwa tyngkheiñ kyndon daw chah pynchitom ki katkam ka aiñ Control of the National Highways (Land and Traffic) Act 2002.
Kiwi de ki kyndon toh wym toh u pynemkaam da ki tanghæng wa ood bha iwa pynthut leh ya ki bru paidbah. Ymtoh wow chah u dai kiad wei lada jia mih i kulmar, daw hap kitkhlieh kiwa pynman ya kani ka yakob.
Ka High Court da ong ko wa toh leh wow yoh NOC na ki Dorbar Chnong wei ki DC hap ki wow bichaar bniah ya waroh ki kot ki sla wei manda hun da waroh deilang u SP wa u BDO wa da biang i pynkhreh, du heitæ donhi u e bor pynman ya ka Fishing Competition.
Kamtæ ka High Court da yoo biang ko wow pynkut noh ya kani ka mukotduma.
Discussion about this post