Ka Raij Tuber ynne ka sngi Muchai ka 17 tarik da pynkut noh ya ka lehniam Behdieñkhlam 2026 kawa heh dooh ha Ri-loom Jaiñtia deiwa wanrah hadooh 64 tylli ki rot na ki Seiñ Raij Chnong waphær waphær, na ki 30 tylli ki chnong wa kynthup 11 tylli ki chnong na West Jaiñtia Hills wa 19 tylli ki chnong na East Jaiñtia Hills, kiwa da rah leh ya ki khubor wa khia heiyatoh wa ka imlang sahlang, i Tip Kur Tip Kha, wow kiar na i drugs, i tih mooyong wa kiwi kiwi.
Ha uni u snem uwa man u snem ka FIFA World Cup, da sakhi leh ya ki durbula ki khloor yalehke Football ka pyrthai.
Kani ka lehniam Behdieñkhlam ka Raij Tuber da sdang ko nadooh ka Pynsiñ ka 14 tarik wei da pynkut ynne ha Biar Aitnar ha Tuber Kmaichnong.
Ha kani ka sngi u Chief Minister, u Conrad K Sangma da man u kam u kongsan, hei emlang u Dy. Chief Minister, u Sniawbhalang Dhar, u Montri sorkar, u Wailadmiki Shylla uwa da chaad lang ha Aitnar, ki MLA ka thaaiñ, u Kyrmen Shylla, ka Santa Mary Shylla wa kiwi.
U Conrad hawa e i klam da pynbna u wa ka sorkar daw wanrah ko ya ka Scheme wa thymme neibynta wow yarap kyntu kynrong ya ka riti dustur, ka lehniam lehrukom wa ya ki seiñ niam waphær waphær.
U Wailadmiki hawa klam cha kiwa pathai khubor da e khublei u ya ki khon ka Raij Tuber dei yooluti wow e u Trekirot yei kyrkhu kyrdoh ya ka jylla, kiwa yahkhmat ya ka jylla wow dang ku ko ha ki bybta waphær waphær.
Discussion about this post