Hadien 221 kynta iwa dapoi 9 sngi i chah thngan, u President ka Voice of the People Party (VPP), u Ardent M Basaiawmoit da pynkut noh u yeini ynne ka sngi wei kani ka rai toh hadien wa ka sorkar da chna ko ya ka Expert Committee yow pait biang ya ka Reservation Policy.
U Ardent da sdang u yei chah thngan ha ka 23 tarik u Naisan ha pchem ka Additional Secretariat, Shillong yow pynbor ya ka sorkar wow sai, wow wai, wow kdaar biang ya ka Reservation Policy kawa da ong u toh kawa noh chiliang palat hadooh wow pyndooh nong ya ki Khasi-Jaiñtia.
Hadien wa da yoh pdiang ya ka chithi na ka sorkar ynne ka sngi kawa da pyntikna wow chna ya ka Expert Committee yow pait biang ya ka Policy, da rai u wow lai liwon noh cha yung.
Kam i dak wow pynyoo wa da pynkut noh yei chah thngan, ka kurim u Ardent, ka Palma da pyntun ja ko ya oo hakhmat ki paidbah kiwa da kbai kyr’iaw ha katai ka thaw.
“Da ini i pynbna ka sorkar wa daw thung ya ka Expert Committee, kamwa nga da kular ya phi ki paidbah, nga da pyndep kam uwa yahkhmat ka VPP, nga toh u wym mih na kani ka thaw hadoooh wa ka sorkar u pynbait ko ya ka Reservation Policy”, da ong u Ardent. “Ka Reservation Policy toh kawi na ka phang wa i da booh i hakhmat u paidbah najrong kiwi won ki phang kiwa boon”, da pynrap u.
Da ong u wa ka Party ym chong ngiah ko tangwa daw booddien neini chakhmat hajrong i thung kaam ka sorkar ya ki Chairman, Vice Chairman, Deputy Chairman wa kiwi ki kaam ya ki Politician.
“Ka Party daw booddien ko neini chakhmat, ka sorkar toh u pyndam ko chi syndon ya kitu ki Chairman kiwa pynlut phut ya ka poisa yong ki paidbah, toh u pyndam leh ya kitu ki Consultant kiwa da su da ka poisa yong ki paidbah khlem wanrah myntoi ya i ki paidbah”, da ong u Ardent.
Ha kini ki khynde sngi wa da chah thngan u, ki paidbah na kylleiñ ki thaw da wan ki wow e mynsien ya oo miet wei sngi ha pchem ka Additional Secretariat, da man ko kam ka yaseiñ neibhah wa da pynman yei ngooh Blai, ki klam e mynsien wei kamjooh i rwai na ki khynroo.
