Shillong: I lai yalap u montri rangbah ka jylla, uwa man leh u National President ka NPP, u Conrad K. Sangma ha jylla Mizoram ka wow man ka Election MLA, ynne ka sngi kani ka yalap da poi ko chawa kut ha Serchhip heiwa daw yakhun u Kapliana Pachuau na ka Party uwa jooh man leh kam uwa pathai khubor nachwa.
U Pachuau daw yakhun u pyrchah ya u montri rangbah ka Mizoram uwa man leh u kyrtong ka Congress, u Lal Thanhawla na Serchhip Constituency, heiwa ka Congress da chah jied ko la palat soo sien.
U Pachuau toh uwa da paw khmat bha ha ka pathai khubor, ha ki yalang ka NPP da embynta leh kiwa rwai wa naam ka jylla Mizoram kiwa da rwai wow pyntoh ha u nood ki paidbah yeiwa emkaam ka jylla.
U Conrad Sangma da ong u wa ka NPP u yakhun ko ha Mizoram dei mynsien wow kreh wow chakri ya ki paidbah ka jylla. “Nga ymtoh wan O heini wow pynjaw ya uwon uwon u kyrtong mo ka party, i kam ka party (NPP) hi ngait i yeiwa bha wa miat kamtæ kwah i wow pynche cha ki paidbah wa i u kreh i neibynta ki paidbah ka Mizoram”.
Da ong u leh wa ka NPP em ko ka thong wa ka luti neibynta ki paidbah ka thaaiñ mihsngi deiwa pynrap, “Ka thaaiñ man ko kawa da kyrkhu da ki sap wa ha rukom nadooh ka put ka tem, ki rang yalehke sports, wa kiwi kiwi. Ha Meghalaya, da pyrkhat i wow kreh wow pynku ya sports wa ka put ka tem, wei thrang i leh i jooh hi ha Mizoram.”
Hajrong i khayi pateiñ hapoh Mizoram, u Conrad da ong u “Ka NPP toh ka party kawa ngait skem ha ka khayi pateiñ ki tre jylla, wei kyrmen i wow ku ka khayi pateiñ hapoh ka jylla kamjooh. Heipor wa chimkti i ya ka sorkar ha Meghalaya da kheiñkor i ya ka khayi pateiñ ki tre jylla deiwa sdang ya ki programme wa boon wow kyntu ya ka kaam deiwa sdang leh ya ka Institute hajrong ini.”
Da pynrap u leh wa ka thaaiñ mihsngi man ko kawa da kyrkhu ha ki liang ki mar poh-khyndaw wei da emkaam wow chim kabu wei wow pynemkaam noh ya ki. “Lada em bynta i ha ka sorkar ha Mizoram daw yaleh i wow pynkylla wei wow pynwandur ya ka deiwa pynemkaam hok ya iwa da em chwa hapoh yong ka.”
Da pynkut u deiwa ong, “Ha kawi ka sngi daw man i ka party kawa heh dooh ha waroh kawi ka thaaiñ mihsngi ka wow yieñ neibynta ki paidbah. Kwah O leh u kyntu ya ki paidbah ka Mizoram wow embynta wa i wow yakhun wow yaleh wow pyntikna wa ki bru yong i yoh ki yei yada. U kreh i chirup neibynta i hok yong i.”
Discussion about this post