Shillong: Ka Meghalaya Football Association (MFA) da pynbna ko wa ya ki Grassroots Leaders Course wa D Licence Programme kattu da ye wow pynman ki haka ktien Khasi hadien wa da dep pynkylla ya ki kot ki sla wa hap puræ naka ktien English cha ka Khasi.
Ka MFA da leh ko ya ini hadien wa da yohbor ko naka All India Football Federation wei daw yarap ko ya kiwa kwah u man kam ki Football Coach wow yoh yaka sikai haka Grassroots Leaders Course wa D Licence hapoh ka jylla.
Ka MFA da pyntip ko leh wa da yohbor ko naka AIFF wow pynkylla leh ya ini i jooh cha ka ktien Garo.
Yow pynkylla cha ka ktien Khasi da leh daka Bala Nongkynrih, kawa man kam ka Researcher ha North Eastern Hill University, deiwa yoh yarap ko na ki Coach ka Shillong Lajong, uwa sikai D Licence u Alison Kharsyntiew wa u MFA CEO uwa man leh u Grassroots Leaders Course Instructor u Arki Nongrum.
Ya ini i jooh da leh ha nyngkong ha India haka jylla Maharashtra heiwa da pynkylla cha ka ktien Marathi wei ka Meghalaya u man ko ka jylla wa ar wow leh ya ini manda sdang ya kani ka e sikai haka sngi nyngkong ka tayaw wow wan.
“Boon ki Coach khuslai ki ya iwa ym em sñiawjooh ki ya ka ktien English iwa ktah ya ki leh wow man ki kam ki Coach lada hap yaleh Exam ki haka ktien English,” da ong u CEO ka MFA hawa yaklam wa kiwa pathai khubor ynne ka sngi. “Ym tooh waroh ki ktien da pynkylla cha Khasi neidaw wa em ki ktien wa emkaam hi u tip da i ktien English tangwa da pynsñiawthooh iyi mut i ha i ktien Khasi,” da ong chooh chooh u.
Kamwa man kattæ du kamwa 10-20% ki Coach na Meghalaya kiwa yaleh yaka D Licence wa Grassroots Leaders Course wa ye u pyndep yaka Exam neidaw wa hap thoh ki haka ktien English iwa man i daw wa kiwa boon ym yoh u man Coach da ong u Nongrum.
Ka MFA da paanbor bor ko naka AIFF wow pynkylla leh cha ka ktien Khasi yaka C Licence Course.
Discussion about this post