Deiwa pynkynmoo ya ki le tylli ki ktien tymmen kiwa man kam ki yurim wa im ki le jaitbru ka jylla, u Conrad da pynemmkaam u da i ktien Khasi, Pnar wa Garo hawa e yei klam ha ka sngi lehkmen Independence Day ha uni u snem ha Shillong yow pynchlur ya kiwa chong chnong wow man ki kiwa skem, kiwa yatylli wei kiwa chlur.
Na ka ktien Khasi da sai u ya ki kyntien im sngi wa ong “Ka Bhalang Ka Imlang” deiwa ong wa ini toh wow kylli i ya idæ iyi u leh i neibynta i bha ka imlang sahlang, u pynchlur ya iwa bha wei wow em yei ktikhlieh yonglang ha ka imlang sahlang.
Na ka ktien Pnar da pynemkaam u ya ki kyntien “Tip Bru Tip Blai” deiwa ong wa lada kwah wow tip chaphang u Blai emkaam wow tip chwa ya u bru wei lada ym tip wow burom ya para bru kammon u tip u burom ya u Blai.
Na ka ktien Garo da chim u ya i kyntien wa ong “Bija gita ma.dime, na.tik gita skonge” iwa mut chirup chirup kam ki ngap kam ki ktæd iwa banjoor yei man kiwa yatylli ha ka imlang sahlang, hapoh ka jylla wa hapoh ka ri waroh kawi.
U Conrad da ong u wa kini ymtoh du kam ki kyntien donhi tangwa kiwa pynyoo yei stat yongrim wei i khlan ka dustur riti yong i.
Da klam u leh yeiwa da leh ka sorkar yow pynchna nadooh ki luti ki syngkieñ, u pynmiat ya ka puræ puthi, i e sumaar sukhær kamjooh wow pynku ya ki thaw wa em cha palatsor wei hawa leh yeini waroh hap i wow kynmoo ya ki yurim wa yieñ nadooh nachwa, kamtæ da khut ya kiwa chong chnong wow em i bahkhlieh neibynta ka ramaw, i pynkhlan ya ka imlang sahlang wei wow ya krehlang yow heh u san kawi pa kawi ka manyung.
“I yoh laitlooid ymtoh du neibynta wa da yaleh yow yoh 79 snem nachwa tangwa ki rai wa chim i myntu neibynta i bha i miat ki khon i mynstep mankawi,” da ong u Conrad.
U Conrad da angnood u wa waroh ki chnong u biang luti ki, waroh ki manyung toh kiwa dap wa biang wei ka mynried yong uwi pa uwi u khynnah u man i iwa skem.
Discussion about this post