Jowai : Ka Seiñ Raij Jowai ynne ka sngi ha Madan Myngkoi Pyrdi, Iongpiah da pynman yalang ko kam ka dak kynmoo warom ya ka sngi chah pasi u Woh Kiang Nangbah khlawait ka ri deiwa emlang ki paidbah wa boon ka Ri-Loom Jaintia.
Ha chwa u sdang kani ka yalang da em chwa i yalang wa kyrpang ha Loom Moolikso heiwa ki waheh wa sian ka Sein Raij Jowai hei emlang u P.N. Syiem CEM KHADC, Dr. S.N. Lamare Associate Professor, History Department ka NEHU wa u ma Puramon Kynjin, Dolloi wa chi por ka Elaka Jowai da booh syntu ki ha i thaw booh sahkynmoo ya u Woh Kiang Nangbah ha pyrdi i ngooh blai wa e da u Wh. Dawanpoi Passah uwa man leh kam u Vice President SRJ.
Ka yalang ha Madan Mynkoi Pyrdi da pyllai da u Wh. O.R. Challam, President Seiñ Raij heiwa da e ya ka kyntien kongsan da u Dr. S.N. Lamare u wa da batai bniah ya ka yaleh pyrchah u Kiang Nangbah ya ki nong British ki wa wan synchar yabor ya ki bru Pnar.
U Wh. P.N. Syiem kam u kongsan da ong u wa ym em pher i por wa im u Kiang Nangbah wa ki por katni neibhah ya ki wa boon ki hok ka jaitbru dang joor ka yaleh nadooh ki bor synchar, ki aiñ wa pynwit ya i im wa man ka sngi ki bru hadooh wa i hok kam ki tre khyndaw. Da e nuksa u wa boon ki aiñ ka council ka wa da pynkitkaam ha ka u chna da pynbood ko yong ki wi ki jait bru khlem da chan ki aiñ wa yatoh wa ka riti dustur ki bru. Da ong chooh chooh wa hadooh katni ka sorkar jylla ym pu ye ko u chna ya ka Mining Policy. Da kular u leh wa u pyrchang u pynbor ya ka Executive Committee u e poisa ko T 5 lak yow chna ya u mot u Woh Kiang Nangbah ha Loom Moolikso.
Da pynphooh pynphieñ ya ka yalang da ki chad wa ki rwai wa e da ka Khynroo Khyllod Committee ka Sein Raij Jowai wa ki wa wan chimbynta ha ka Youth Conference.
Heijooh i por da kynmoowarom ya u Woh Kiang Nangbah ha Madiah Kmai Blai, Syntu Ksiar wa da pynman da ka Kiang Nangbah Iasiatkhnam Memorial Society, Jowai heiwa da wan u ma Stephanson Mukhim, MLA kam u Kongsan, katwa u ma Hoolando Lamin MDC, JHADC, da man u kam u symbood kongsan hei emlang u Edelbert Nongrum, MDC KHADC
Ha kani ka sngi da yoh yei klam na u ma Puramon Kynjiñ u Dolloi Elaka Jowai wa chipor wa na kiwi kiwi.
Discussion about this post