Pynlait ka KHADC ya ka dan ki muktiar, kylli ka liang pyrchah wa kammon kiwa dai kwai dong hap ki wow su dan

Ka Khasi Hills Autonomous District Council (KHADC) da yoh ko wow lum ka dan wa 75 lak 96 hajar 936 tangka ha u Wisu (March) 2025, wei nadooh u April hadooh u Septemberr 2025 da yoh wow lum hadooh Rs. 10 klur 81 lak 99 hajar 703 tangka.

Hawa jubab yeiwa kylli wa da wanrah da ka MDC ka Liang Pyrchah, ka Grace Mary Kharpuri, u Executive Member wa pait ya ka muna tangka, u Seiborlang Warbah da ong u wa najrong ki jait kaam, hap leh wow su ka dan Professional Tax, wei da pynlait du ya ki muktiar (Lawyers).

Katkam i ong u EM, i pynlait ya ki muktiar na ka dan toh neidaw wa kiwa boon ym yoh ki yeiwa toh u yoh deiwa tikna.

Hajrong i pynlait ya ka dan ya ki muktiar, neiliang ka liang pyrchah wa kynthup ya u MDC ka Laban, u Ricky Shullai wa u Titosstarwell Chyne da kylli ki wa kammon won kiwa chondai kwai dong kiwa man ki tre chnong da hap su dan ki heiwa ka kamai ki leh man ko ka wym tikna wei kawa duna ya ka Rs. 50,000.