Ka Regional Democratic Alliance (RDA) kawa emlang ka UDP wa HSPDP da pynlait paidbah ko ya ka thup yong ki thong yaleh Election MP 2024 cha ka Lok Sabha, kawa daw man ha ka 19 tarik uni u bnai.
Ki phang Election ka RDA kynthup ki yei dawa na ka sorkar India wow tipmit yei kyrdan khian paaid ya ka Seng Khasi wa ki Seiñ Raij kiwa dang em ha ka niamtre khnang wow yoh ki yei myntoi kamwa man kiwi ki khian paaid.
Wow yasaaid wei pynchitom ya kiwa thombor ya ki khian paaid, wow pyrchah ya ka Uniform Civil Code wei kamjooh ya ka Citizenship Amendment Act. Wow yasaaid leh ha ka sorkar India yow pynkhlan chooh yei pynkup bor ya ki District Council ha ka jylla.
Kiwi won ki phang wa kongsan toh wow pynkrehkaam ya ka Inner Line Permit wei wow kdoh u khoom yei yoh u psiah laitlan ki bru na baar wei wow pynpsiah noh ya ka ktien Khasi wa Garo ha ka Eight Schedule wei kamjooh wow pynbait janai ya u pood u ang ka Meghalaya waka Assam.
Ka RDA da booh thong ko leh wow yasaaid neibynta i bha i miat yong ki Khasi wa Garo kiwa sah ha ri Bangladesh wei wow pynkhlan ya ka khayi pateiñ.
Kiwi de toh yow pynskem yei hok hajrong i khyndaw u chyiap, ki mar pohkhyndaw, i mantre wei i wym chah ya ki aiñ ka sorkar India kiwa ktah ya ki tre ri.
Ki phang Election ka RDA, da kdaw leh wow kyntu ya ki khynroo ha i yoh kaam yoh jaam, i hok yong kiwa duna hei doh i pran, wow kyruiñ khmat cha ki kynthai, wow em ka Cadre yong ka Civil Service ka Meghalaya hi wei wow pynku leh ya ka rep ka riang.
Da booh thong leh wow wai ka luti yaklam yasuk waka HNLC ha ka luti kawa em yumut wei wow pynsah naam ya ki bru chlur yong ka jylla najrong kiwi de.
Discussion about this post