U Montri wa pait ya ka chnat puræ puthi ha ka jylla, u Lahkmen Rymbui da pyntip u wa ka sorkar India da pynlait ko ya ka poisa du T. 59 klur neibynta wow su ya ka tulop kiwa SSA, heiwa da ong u leh wa ha ka tayaw wow wan boi daw ye wow su noh 2 bnai ka tulop yong kiwa sikai.
Da pyntip u wa ka sorkar jylla da booddien ko wa ka sorkar pyrdi hajrong ka tulop kiwa sikai, wei da paan leh T. 140 klur neibynta wow su lut ya ka tulop kiwa sikai SSA ha ka jylla kawa da sahkut kattu la 5 bnai.
Hawa kylli, u Rymbui da pynsñiaw u yei kyrmen wa ka sorkar India daw chim ko ya luti wow pyndooh noh syndon yei eh kiwa sikai iwa da mih man-i-por na ka tulop, neibhah hadooh katni ym ye wow su lut ya ka tulop wa dang sah, deiwa pynrap wa man ko iwa eh ya ka sorkar jylla wow su ya ka tulop lada ka sorkar pyrdi ym pynlait ko ya ka poisa, wei da pyntip u leh wa ha Meghalaya emkaam kamwa T. 26 klur chi bnai wow su ya ka tulop yong kiwa sikai SSA.
Kam wow kdaw heini wa kiwa sikai skur SSA hapoh ka jylla kiwa em hadooh palat 12,000 ngut, da sah ka tulop kattu la 5 bnai iwa da pynman leh ya ki wow yakhih paidbah wa jai jai ynnin ka sngi ha nongbah Shillong wei da e por ya ka sorkar wow su lut ya ka tulop hapoh chi tayaw.
